15 snem ba la mih khmat ym don soh ka Congress ha Parliament : UDP

U President Rangbah ka UDP u bah Metbah Lyngdoh, u la ong ba ka Congress ka la mihkhmat 15 snem sha Parliament hynrei haduh mynta ym don soh eiei. U bah Metbah u la ong ba ki paidbah ka ri Khasi-Jaintia kila ailad 15 snem ia u bah Vincent H Pala ban leit iasaid ia ki mat ki jura jong ka jaitbynriew sha Parliament hynrei, kaba sngewsih ka long ba ym shym iohi ia u soh ha kine ki snem. “Ki paidbah kin bishar aiu u bah Vincent u la leh ha kine ki snem ba u long kum u MP,” ong u bah Metbah ha ka jingialang ialap elekshon ia u kyrtong ka RDA. U la ong lada kren tang ia u pud u sam, balei ym lah ban pynbeit, ha 2009 haduh 2014, ka sorkar Congress ha Delhi, ha Assam bad ha Meghalaya, hynrei kim leh eiei ban pynbeit ia u pud u sam. “Shu peit shwa tang ia u pud u sam ka Meghalaya bad Assam, ha u 2009-2014, ka sorkar Congress ha Delhi, ka sorkar Congress ha Assam, ka sorkar Congress ha Meghalaya bad u MP jong ngi ruh u dei na ka Congress, balei ym lah ban pynbeit ia u pud u sam, ka dei bym don ka mon, hato dei ba kwah ban ialeh politik, ym don soh eiei ha kine ki 15 snem”, la ong u bah Metbah.

Haba ther ia ka jingkren jong ka seng VPP, u bah Metbah u la ong ba don kiba kren riew blei haduh bym sngewthuh sngewthaw shuh bad don kiba pynshit.“Katba dang ia long jingialang kiwei ki party, ki don kiba wan halla, balei ban wan halla, ngi wan hangne ym ban pynbor iano iano hynrei ban iawer da ka mynsiem sngewrit. Hynrei don ki party, kiba sngew sarong, sngew meng , sngew biang lut tang ialade, kiwei kiba duna suda, kiwei kiba tuh suda, kiwei kiba pyniap briew suda, kiwei kiba pynkulmar shnong suda. Hato ngi wan hangne ban leh kumta?, ngi wan hangne da ka jingkitkhlieh na bynta ki paidbah, ym ban shu leh shongshit kulmar. Haba peit ia ki social media, ym nud peit shuh ia ki jingkynthoh ia ka RDA, ia u UDP, ia ka HSPDP, ia u kyrtong, da ki ktien khlem akor, bym pat ju jia mynno mynno ha ka histori ka jaitbynriew. Lada don uwei ar uba bakla, wat shim ba baroh ki long kumta. Ngam tip balei ngi ia long kumne ha ka jaitbynriew, hato ka dei ka jingmyntoi ialade shimet jongno re?”, la ong u bah Metbah.  

U la ong ba u kyrtong ka RDA u don ka jingkyrmen ban poi sha ka thong, namar haba khein ia ka jingioh vote ha ka jingioh ha ka MLA elekshon, la tam ia baroh. “Na ki 36 tylli ki konstitwensi, ngi ioh 2.99 lak vote bad ka HSPDP ka ioh 66 hajar bad lada khein lang, ngi ioh 3.65 lak vote”, la ong u bah Metbah. Ha kajuh ka por, u la khot lang ia kiwei ki seng riewlum ban wan kyrshan lang ia u kyrtong ka RDA. “Kum ka RDA, ngi kwah ruh ba kiwei ki party kiba kam ialade kum ki seng riewlum, ngi pdiang ia ki ban wan lang ha kane ka thup hynrei ki bym dei seng riewlum ka eh ban pdiang ia ki namar ba ki mat kiba ngin shim kam, ki long na bynta ki paidbah, ka jaitbynriew jong ngi”, la ong bah Metbah.