200 tylli shisngi ki sei kali kali thymmai ha East Khasi Hills

Ka tnad pulit ka kyrmen ba ka jingsahkut kali kan kham sting ha kane ka kynti khamtam ha ka por long skul, namar ba ka sorkar kan pyniaid ia ki bos STEMS (Sustainability Transport Efficient Mobility Society). Ka sorkar ka la wanrah da ki bos STEMS ban leit shaw bad leit on ia ki khynnah ha sor Shillong. Kumba ju sakhi, ka nongbah Shillong, ka la mlien ban mad ia ka jingsahkut kali.Katkum ka tyllong khubor na ka tnad pulit, palat 300 ngut tam ki pulit ki don ha surok man ka sngi ha kylleng ka nongbah Shillong ban pyniaid beit ia ki kali naduh 7baje mynstep haduh 9baje janmiet bad teng teng haduh 10baje janmiet ruh. Ka tnad pyniaid kali ki pulit ka la phiah ha ki lai bynta ia ka kynhun, kynthup naduh 7am haduh 1pm, naduh 2pm haduh 7pm bad kiba don ruh ha ka por mynmiet katkum ka jingdonkam ki jaka.

Kawei ka jingeh ruh ka dei namar ba ki nongniah kali kim long dissiplin haba ki niah kali bad ki tur rak rak bad knieh jaka wat ha ka surok ba khim bad kane ka la wanrah ka jingsahkut kali bad ka buh jingma ia ka leit ka wan jong ki briew. Shwa ban sdang ki skul mynta u bnai, ki pulit kila pynkhreh bha ban pynbiang ia ki pulit kylleng ki jaka khamtam ha ka thain Laitumkhrah, Dhankheti kiba bun ki skul, bad ki khynnah skul ruh. Ha Dhankheti kaba ju pyniaid shiliang ha ka por long skul, kan neh ka jingpyntreikam kumba ju long, nalor ki pulit ban don ha kitei ki jaka. Kin don ruh ki jaka ban ym shah iaid kali bad ban iaid shiliang.

Ka jingeh ban pyniaid kali, ka dei namar ka jingmih bun ki kali man ka sngi katba ka surok pat ka neh kumjuh. Tang ha East Khasi Hills, man ka sngi kiba rejister kali thymmai ki don 200 eiei bad kumba 3 lak tylli ki kali ha kane ka district. Ki pulit ki kyrmen ba lada lah ban pynkynriah ia ki ophis sorkar kum ka Secretariat sha sor Shillong Thymmai kaba don haduh kumba 3 hajar ngut ki nongtrei, kan pynkham aram ia ka jingkhapngiah kali ha ka nongbah.