2023 Africa Cup of Nations: Pynliem ka South Africa ia ka Morocco, iohrung sha ka Quarte-final

Ka South Africa ka la iohrung sha ka quarter-final ka 2023 Africa Cup of Nations hadien ba ka la lah ban pynliem da 2-0 ia ka Morocco ha ka jingiakhun ia ka Round-16 hynnin ka miet. Ka jingjop ka South Africa ka dei na ka jingbym lah pynrung u Achraf Hakimi ia ka penalty. Da kane ka namjop ka South Africa kan aireng pat pyrshah ia ka Cape Verde  ha ka jingiaknieh rung sha ka semi-final.

Haduh kaba kut ka kylla step, ka jingiakhun ka la kut noh ha ka jingiakhaid khlem ia thepkol. Hynrei ha ka kylla miet ka South Africa ka la pyneh triang bad tad ha ka minit kaba 57 u Evidence Makgopa u la thep jlang ia ka kol nyngkong kaba ai mynsiem ia ki para nongialehkai. Ki rangialehkai ka Morocco ruh kim ailad satia ban pynneh beit triang hynrei ka jingtrei shitom jong ki kam shym la seisoh. Shuwa ban pynkut pynwai sa shisien ka South Africa ka la thep sa ia ka kol ba-ar lyngba u Teboho Mokoena ha ka minit 90+5. Ka Morocco ka hap iakhun tang 10 ngut ki rangialehkai  shuwa ban kut pynwai hadien ka jingioh red card u Sofyan Amrabat uba dei ruh u rangialehkai pdeng ka Manchester United.

Lada jia ba iohrung sha ka semi-final, ka South Africa kan aireng pat pyrshah ia ka Nigeria ne Angola. Ka jingshahrem ka Morocco ka la pynkyndit ia kiba bun namar ka dei ka ri kaba iohrung shaduh ka semi-final ka 2022 Fifa World Cup bad nalor kane ka dei ka team kaba wan kyrdan nyngkong na dewbah Africa.Ha kawei pat ka jingialehkai, ka Mali ka la iohrung sha ka quarter-final hadien ba  pynliem da 2-1 ia ka Burkina Faso. Ha ka quarter-final ka Mali kan aireng pat pyrshah ia ka Ivory Coast.