Ka Sorkar ka la ithuh kumba 25 acre ka jaka Sorkar ban pyntrei ia ki jingtei bapher bapher ki ban pynkylla dur thymmai ia ka Nongbah Shillong kata ban pynitynnad bad pynkylluid ia ka. Ia kane la pyntip da u Myntri Rangbah ka Jylla u Conrad K Sangma hadien ka jingleit jurip ia ka Phan Nonglait Park, ka Brightwell Bunglow kaba don ha Barik Point, Anjalee Point bad Polo. Ia u Myntri Rangbah la synran lang ki heh Ophisar ka PWD, Urban Affairs, bad Forest and Environment. “Ka Sorkar ka thmu ban shna ia ki lynti iaid kjat ba thymmai, ki green park, bad ki jaka pynbyrngia ban nang pynlong ia ka Shillong kaba khring bad ai khambun ki jaka paidbah sha ki nongshong shnong” la ong u Conrad.
U Conrad ula iathuh ba ha Barik Point yn sa tei ia ka jingtei sahnam kynthup ka jingpynieng ia ka jaka pynher ia ka Lama ka Ri, kaba lah ban iohi na kylleng ki jaka jong ka Nongbah. Ula pyntip ba ki jaka ba lait ruh yn sa pyndonkam ban shna ia ki jaka paidbah kum ki restaurant, ki jaka pynieng kali bad kiwei kiwei ki jingdonkam ki ba lah ban pyndonkam da ki trai shnong bad ki nongwankai. U Myntri Rangbah ula pyntip ba iaka Ophis ba don mynta ha Barik Point yn pynkynriah ha u bnai Naitung, bad yn bud da ka jingtei ba thymmai ka ban sdang ha u Nailar. Haba iadei bad ka jingkhapngiah ki surok ha Shillong, u Myntri Rangbah ula ong ba kine ki sienjam ba thmu ban shim kin kynthup ruh ia ka jingshna ia ki parking lot ba thymmai ha ki jaka ba i donkam.
“Kane ka sienjam ka dei kaba shim da ka jingthmu ban pynduna ia ka jingpynieng kali harud surok, ka ban pynkylluid ia ki kali ba kin iaid. Ka surok thymmai ka ban iaid lyngba ka NEFA Secretariat sha Military Hospital ruh yn sa shna ban pynduna ia ka jingkhapngiah ha Anjalee Point, kawei na ki jaka ba khapngiah bha ha Nongbah” ula ong. Ha ka jingjurip, ula bthah ia ka tnat Forest and Environment ban pynkynriah noh ia ki mrad na Phan Nonglait Park sha ka State Zoo ba dang shu tei thymmai ha Ri-Bhoo District.
