Ka Sorkar Jylla ka la pynbna ia ka rai ban pynkiew ia ka tulop palat 1200 ngut ki Nongtrei ka Samagra Shiksha Abhiyan (SSA) da 25%. Haba pynthikna ia kane, u Commissioner Secretary ka tnat Pule Puthi u Vijay Kumar Mantri ula iathuh ba hadien bala kyntiew sha ka 25%, ka Sorkar Jylla kan hap ban pynlut T.15,98,13,000 man u bnai na ka bynta ban siew ia ka tulop ki Nongtrei SSA. Hashuwa kane, ka Sorkar Jylla ka hap ban pynlut man u bnai haduh T.12,78,50,400 ban siew ia ka tulop jong ki 1037 ngut ki Nongtrei SSA. mKa jingdon ki Nongtrei SSA (Non-Teaching) hapoh ka Jylla ka long baroh 1037 ngut, kata 35 ngut ha State, 295 ha ki District, 707 ngut ha ki Block.
“Nga la iakynduh ia ki Nongtrei SSA bad nga la pyntip ruh sha u Myntri Rangbah ka Jylla haba iadei bad ka jingdawa jongki. U Myntri Rangbah ula kular ban lum da ka jingialang ba kyrkieh ban iakren halor ka mat jingdawa jong ki Nongtrei SSA” la ong u Vijay Mantri. Lah ban kdew, ba ha ka 26 tarik Naitung, ka Sorkar Jylla lyngba u Special Officer In-charge ka tnad Pule Puthi kala phah da ka shithi sha u State Project Director ka Samagra Shiksha (SEMAM) bad Director of School Education & Literacy, Meghalaya ba ka kyntiew 25% ka tulop ki Nongtrei SSA.
Kane ka jingkyntiew iaka tulop ki Nongtrei SSA kan treikam naduh ka 1 tarik Iaiong, 2024. “Halor ka mat bala kdew hangne, la bthah ia nga ban pyntip ia ka jingmynjur jong ka Sorkar Jylla ban pynkiew da 25% ka tulop jong ki Office Staff ka Samagra Shiksha (Non-Academic) ha ka Jylla, District bad Block MIS, DEO bad Accountant, kaban treikam naduh u snem mang tyngka 2024-25 kata 1 tarik Iaiong, 2024” la ong ka shithi. Ia kane ka jingmynjur la pynmih halor ka shithi ka tnad Finance (EA) ba 18 tarik Naitung 2024. Kane kala ioh ia ka jingmynjur jong ki bor ba dei khmih”.
