Ki pulit ka Ri Bhoi District hadien ka jingbud dien khlem shongthait ban thwet ia ka kynhun ba ju donkti ban dawa pisa na ki kali kit mar khamtam ki kali kit dohkha, syiar bad kiwei kali kit mar hynnin ka sngi, ki la ioh kem ia 4 ngut kiba kynnoh donkti lute ia ki kali ha u surok bah National Highway ha Ri Bhoi District. Katkum ka jingtip la iathuh la kumba ar lai bnai ki pulit Ri Bhoi ki la ioh ki jingujor na ki nongniah kali kit mar ba ki ju shah lute pisa, mobile bad kiwei nalor ba ki shah shoh ruh ha ki kynhun nonglute bym lah ban ithuh kiba ju pynap ia ki kali kit mar ha ki surok ba kham kynjah bad khongdong ha surok bah khamtam ha ki por mynmiet.Halor ki jingujor nongniah kali kit mar, ki pulit ka district ki la shimkhia ban pynlong ka jingtohkit bad thwet ia katei ka kynhun nonglute da kaba iaid patrolling bad ha ka miet 10 tarik Nailur ki pulit ki la ioh jingtip halor kawei ka jingjia shah lute kawei ka pickup kit dohkha ba la pynsangeh da ki ar tylli ki kali ha kaba ki la shoh ia u nongniah bad u nongbud bad hadien ki la lute pisa bad knieh ia ki mobile phone bad phet bak na katei ka jaka.
Mar mar ia ioh jingtip halor kane kane ka jingjia, ka kynhun pulit Special Team ka leit sha katei ka jaka ban tohkit bad dei hadien katto katne por, la ioh jingtip halor kawei ka kali maruti Alto ba la pynieng ha Pahamsyiem, mar mar ki pulit ki leit ban bat ia katei ka kali bad kem ia uwei ba donkti ha kane ka kam lute katba uwei ula lait phet na katei ka jaka hynrei hadien shiteng kynta ka jingiakthong ki pulit ki la ioh kem noh ia u. Ha ka jingtohkit ia kine ar ngut, ki la phla ba ki don 4 ngut ba donkti ha ki kam lute ia ki kali kit mar ha ki por mynmiet ha u surok bah bad hadien ki pulit ki la ioh kem noh ia kiwei pat ki ar ngut ba donkti.
Ki saw ngut ba shah kem ki kynthup ia u Ricky Tangsang (26) ba sah ha Sajer, Nongpoh, u Mustafa Lyngdoh (23) na Umlyngkdait, u Shem Warjri na Umsning Proper A bad u Kyrshanbor Marwein (22) na Mawroh, Nongpoh. Ki pulit ki la kurup ar tylli ki kali kynthup ka maruti Alto ba don number AS 01 FN 4202 bad ka Maruti Suzuki Baleno ka bym pat don number. Ki pulit ki la pyngnat ia kine 4 ngut ha ki kyndon aiñ katkum ka Robbery Acts bad kiwei lem bad ejehar na u nongniah ka Mahindra pickup kiba la shah shoh ha kitei ki saw ngut.
