U President ka NPP Meghalaya u bah Prestone Tynsong, ula kop ba ka NPP hadien ka elekshon shiteng samoi ka ban long ha Gambegre konstitwensi, kan sa nangkiew jingkhein shuh shuh ha ka jingdon ki MLA. “Ka NPP kan nangkiew jingkhein shuh hadien ka elekshon shiteng samoi ka ban long ha Gambegre konstitwensi bad ngin jop sa kawei ka konstitwensi,”la kob u bah Prestone. U bah Prestone haba kren ha ka jingialang rakhe ia ka sngi seng jong ka NPP ha State Central Library, ula ong ba wat hapdeng ka jingshah kren laiphew jait kin ym artatien hynrei kin nangia trei shitom.
Ula ong ba lada ka party ka la jop ha u snem 2018 haduh 2023, ula iathuh lypa ba ha 2028 ka party kan jop kham bun. Haba kren ha ka jingialang, u bah Prestone uba dei ruh u symbud myntri Rangbah ula ong ba ma u bad kiwei 7 ngut ki la iasoh sha ka NPP ha u snem 2018 shwa ka elekshon bad ha katei ka elekshon ki jop 19 ngut bad ki la ioh ban ialam ia ka sorkar. Bad hadien kane, ha ka elekshon 2023, ka NPP ka la jop 8 ngut na Khasi-Jaintia Hills bad 18 ngut na Garo Hills hynrei hadien ka elekshon ka la kot sha ka 31 ngut hadien ba la wan iasoh 2 ngut ki MLA ka PDF bad 3 ngut na ka Congress.
“Nga iasoh sha ka NPP ha ka 4 tarik Kyllalyngkot 2018 ryngkat 7 ngut ki MLA ha ka jingialang paidbah ha Polo bad ka dei ka party kaba ar ha ka jingheh ha ka 2018, kaba wan nyngkong ka Congress kaba don 22 ngut ki MLA, ka NPP ka don 19 ngut ki MLA, ha kaba ka NPP ka la ialam ia ka sorkar”, la ong u bah Prestone bad bynrap, “Hadien ka snem 2023, ka NPP ka jop 26 ngut, 8 ngut na Khasi-Jaintia, bun kiba shu rem salit tang 2-3 spah. Hynrei hadien katto katne bnai, ka PDF ka la wan iasoh sha ka NPP bad ngi la iadon 10 ngut na Khasi bad hadien la wan sa 3 ngut na ka Congress bad ka NPP ka don 13 ngut na Khasi-Jaintia. Bad ngi la ioh ia u number jadu ban poi sha ka 31 ngut ki MLA”, la ong u bah Prestone.
