Ka tnad ka koit ka khiah jong ka sorkar jylla mynta ka sngi ka la pynlong ia ka jingrakhe ia ka World No Tobacco Day ha Khyndailad kum shibynta ban pynshai paidbah halor ka jingktah kaba mih na ka jingpyndonkam ia ki jingdih bad ka jingbam na ki Duma.
Ka Joint Director jong ka Healh Services MCHFW kaba dei ka State Nodal Officer ka National Programme for Prevention & Control of Non Communicable Disease ka Dr C Iangrai, ka la iathuh ba ka jingdon jong ki khynnah skul kiba hapdeng ka rta 13-15 snem kiba pyndonkam ia ki duma ka long haduh 33.6 % ha kane ka jylla.
“Katkum ka surbe ba la pynlong da ki skul, la ioh jingkhein ba ki don haduh 33.6 Percent ki khynnah kiba pyndonkam ia ki duma kiba mih tdem bad ki bym mih tdem,” ong ka Dr Iangrai.
Ka Dr Iangrai ka la ong ba kane ka jylla ka jyllei bha ka jingpang bampong (Cancer) namar ba bun kidei kiba pyndonkam ia u duma,
Katkum ka jingong ka Dr Iangrai ka jylla Meghalaya ka don ha ka kyrdan ba saw napdeng ki jylla jong ka thain Lammihngi, kiba khlain ban pyndonkam ia ki duma.
Ha kajuh ka por, ka Dr Iangrai ka la batai ia ki paidbah halor ki jingpang kiba lah ban thaw na ka jingdih ki duma, ki long kum ka jingpanng bampong, ka jingpang shini, ka jingpang Khiering nalor kiwei de.
Ka la ong ba ki jingpang ba ioh na ka jingpyndonkam ia ki duma ki long ki bym iabit iwei ia iwei hynrei ki long kiba ktah ia ki dkhot met namar ha ki duma ki don ki kynja bih kiba la tip kum u ‘Nicotine’.
