Ban pyllait ia ki nongrep synsar na ka jingshah khnoit dor, la mih kawei ka kompeni kaba la ai kyrteng, ka Basuba Brooms Producer Company Limited ha shnong Khliehumstem, Ri-Bhoi District. Kane ka dei ka Company synsar banyngkong eh ha kane ka jylla bad ka jingseng ia kane ka kompeni ka long na bynta ban iarap ia ki nongrep synsar na ka jingshah khniot dor bad ka jingshah ot kilo. Ha ka jingiakren bad uwei na ki nongpyniaid kane ka kompeni, u bah Pynshai Masharing uba dei kum u Office Assistant kane ka kompeni, ula ong ba la seng ia kane ka kompeni ban iarap ia ki nonngrep khamtam na ka jingshah ot kilo, ban pyllait na ka jingshah pynhap kyrdan ia ki synsar kum u shi nombor, ar nombor bad ban pyniaid iew ia u synsar ha ka dor kaba kham bit kham biang.
U bah Pynshai Masharing, ula iathuh ba ia kane ka kompeni la iarap kyrshan da ka National Bank for Agriculture and Rural Development (NABARD) bad ka NAB Foundation.U bah Pynshai ula iathuh ba ka thong ka long ban lum ban lang ia ki para nongrep synsar bad ban pyllait na ka jingshah khnoit ha ki kharkaia. “Ban lait na ka jingkhnoit dor, ia u synsar la thain bad thep ha u paip plastic shwa ban leit die sha iew bad kane ka la pyllait na ka jingshah khnoit ia ka dor, ka jingshah khein nombor ia u synsar. Ki la thain da u paip plastic namar ba da u thri ka dor ka la kham rem bad ka shim por nalor ka jingkyrduh ban ioh ia u thri,” la iathuh u nongpyniaid ka Kompeni u bah Pynshai.
Ha kane ka kompeni ki don 10 ngut ki Director ki ban ia pyrkhat kam ban pyntyllun ia ka kam na ka por sha ka por.Ula iathuh ba haduh mynta la don ki briew kumba 11 ngut kiba la wan iakren ban thied ia u synsar bad ban pyniaid iew shabar jylla kum ha Mumbai, West Bengal, Delhi bad kiwei ki jaka. Ha ka jingiaid lynti kaba dang shibit por, ka kompeni ka la lah ban iarap ia ki nongrep watla ki dang don kiba sngew artatien ban rung dkhot namar ba ka long thymmai ha ka jingmut jingpyrkhat jong ki ia ka kyrteng kompeni. Ia mynta ka kompeni kam pat lah ban shim bun u synsar namar ba kam pat don ka spah kaba heh. Ha kane ka kompeni, ki nongrep ki hap ban rung dkhot lang ha kane ka kompeni, ha kaba kin leit rah ia u mar sha ka kudam bad ki sa thain ia u synsar ban leit pyniaid iew.
Katkum ka jingiathuh, ka jingpynmih synsar na katei ka thain Khliehumstem, kam duna ia ka 500 ton ha ka shi snem. mU bah Pynshai ula iawer ia ki nongrep ban iai shah ban iatylli na bynta ka jingbit jingbiang jong ka kam ka jam bad ka kamai kajih jong ki. Ha kajuh ka por, ula kyntu ia ki nongthied kiba don jingthmu ban pyniaid iew ba ki lah ban iakynduh ia ki nongpyniaid jong kane ka kompeni.
