Ka VPP kan ioh synshar ha District Council bad ha ka Jylla: Ardent Basaiawmoit
Shillong Jylliew : U Nongialam ka Voice of the People Party mynta ka sngi ula pyntip paidbah ba ha ka 8 tarik Jylliew, ka VPP kan pynlong ia ka jingialang paidbah halor ka jingjop ia ka ilekshon MP ha Smit ha ka por 11 baje.
Ia kane u bah Ardent ula pynbna hadien ba Dr Ricky Syngkon ula ioh rah ia ka jingjop kum u MP Lok Sabha na Shillong Parliamentary konstiwensi.
Haba kren paidbah mynta ka sngi ha Golflink, u bah Ardent ula ong wat hapdeng ka jingshah kynthoh bad ka jingialeh kaba jur, ka VPP ka la ioh ia ka nam jop namar ba kam don ia ka jingartatien.
Ula ong ba kane ka jingjop ia ka MP ilekshon ka dang dei tang ka jingsdang jong ka jingkylla bad mynta kim dei ba ki iakhun tang ia ki seng sain pyrthei kiba iakhun pyrshah ia ki hynrei kin hap ban iakhun pyrshah ruh wat ia ki ophisar sorkar kiba don ka jingshah liang.
“Ngin pynskhem ia kane ka jingngeit jong ngi khnang ba ha kawei ka sngi ka VPP kan ioh synshar ha District Council bad ha kane ka jylla khnang ban lah ban wanrah ia ka jingkylla,” ong u bah Ardent.
Ula ong ba haduh mynta ym pat ju jia ha jylla Meghalaya bad ha ka ri India ha kaba ki heh sorkar ki la pyrshang ban khanglad ia ka jinglehkmen da kaba pynjari da ka kyndon 144 CrPC.
U bah Ardent ula ong ba kumba ki paidbah ki la ai ka jingshaniah ia ki nongialam ka party, ka VPP kan ym shet kylla ia ki paidbah.
