U MLA ka Congress u bah Ronnie V Lyngdoh, ula ong ba ka sorkar ka dei ban pynwandur ia ka Iewduh bad ka dei ban shim ia ka rai kaba tyngeh ban pynkynriah ia ki Kharmetor na them Iewmawlong. Lah ban kdew ba ka jingthmu ka sorkar ban pynkynriah ia ki kharmetor na them Iewmawlong ka dang sahkut haduh mynta khlem pat lah ban poi sha ka thong. Haba kren sha ki lad pathai khubor, u bah Ronnie ula ong ba ka sorkar kam dei ban shu kut tang ha ka jingshim rai hynrei ka dei ban leh bad ban buh thong khnang ban ym sahteng ka kam.
“Ka sorkar ka dei ban don ka jingshlur ban shim ia ka rai kaba eh na ka bynta ban pynneh ia ka shongsuk shongsain. Namar lada phi kwah ban pynsngewbha ia baroh, phi pynsngewsih pat ia baroh. Ka sorkar ka dei ban leh ia kaba dei wat lada don ki bym iahap hynrei na bynta ka jingbha jingmiat jong u paidbah,” ong u bah Ronnie. U bah Ronnie ula ong ba ka Iewduh mynta ka la khapngiah na ka jingwan kamai kajih ki briew, namar kata donkam ban pynwandur ia ka Iewduh ka ban long kaba khuid, ki lynti iaid bad kiwei ki jingdonkam u paidbah ki dei ban biang.
“Ka sorkar ka dei ban shim ia ka rai kaba eh, namar ba katei ka jaka ka dei ka iew bad la dei ban pynkynriah ia ki shawei khnang ban pynwan dur ia ka iewduh kaba itynnad namar ba kane ka iew kaba la khapngiah na ka jingwan kamai kajih ki briew.
