Ka seng Hynniewtrep Youth Council (HYC) Sengkmie mynta ka sngi Palei, ka lap ba ki don bun bah ki bar jylla kiba wan sah beain ha ki jaka ba don ha lyndet jong ka Them Motor. Ia kane ka seng ka la lap ha ka jingleit jurip ia ki jaka sah ki bar jylla kiba don ha lyndet jong ka Them Motor bad ka la sakhi ruh ba kadei kawei na ka ktem khaii droks ha kane ka jylla. Ha kane ka jingjurip ka seng ka la lap ba ki don palat 100 tylli tam ki iing ba la shu sah beain da ki bar jylla ha katei ka jaka kaba hap hapoh ka Shillong Cantonment Board. Katkum ka jinglap ka seng na kane ka jingjurip, kine ki jaka shadien ka Them Motor ki la kylla kylla long ki jaka slum bad ka jaka khaii drugs.
Shuh shuh katkum ka jingwad jingtip ka seng, la ong ba ka jingiohlad ban bsuh ki bar jylla ha kine ki jaka, kadei na ka jingai wai ki khar metor hynrei naduh ba don ka jingiakhih ha u snem 2018, kine ki khar Motor ki la sangeh noh ka jingaiwai. Haba kren sha ki lad pathai khubor u President Rangbah ka HYC u bah Roy Kupar Synrem, u la ong ba kine ki briew kiba sah beain ha kane ka jaka ki kam ba ki la sah da ki phew snem naduh mynshwa. Ula ong ba ha ka jingtwad jingmut ka seng na kine ki bar jylla kiba sah beain, bun kim dei ki nongshong shnong ba pura bad bun kim dei kiba don ia ka Epic ha kane ka jylla hynrei ki wan na kiwei ki jylla.
“ Kaba i saitmet ka long ba i kamra ba 10 phut ki ia shna ar kyrdan lai kyrdan ban sah 20 ne 30 ngut ki briew ha kawei pa kawei ka kamra. Ki la pynlong ia kane ka jaka kum ki jaka slum namar ba wat tang ban iuhkjat la i saitmet,” ula ong. U la pynpaw ia ka jinglyngoh ba kumno ka MeECL kam shym la leh eiei namar ba kine kiba sah beain ki ioh ban tan bording khlem siew hynrei katba ki trai ri kiba siew ia ka bai bording, lada kim lah ban siew ki la wan mar mar ban ot noh ia ka bording. U bah Roy Kupar u la buh jingkylli ia ka sorkar, ka Shillong Cantonment Board bad ka MeECL ki la leh aiu halor kine, balei ki leh matlah ia kine ki briew kiba sah beain.
U President ka seng ula ong ba kine ki bar jylla, mar ia hiar jurip ka seng ha kane ka jaka, kumba 4 ne 5 ngut kiba ju khaii ia u droks ki la phet rieh na kane ka jaka. “ Ngi sngewthuh ba kane ka jaka, ka lah ban dei kawei na ki ktem die droks bad kumjuh ka ktem jong ki kam sniew kiba ju jia ha kylleng ki jaka,” ong u nongialam ka seng. U la ong ba na ka liang ka seng ka la ioh jingtip ia ka kyrteng jong ki nongdie droks bad ka seng kan sa buddien ia kane ban pyntikna ba kine ki briew kiba khaii ia une u droks kim dei ban sah ha kane ka jaka. Ula ong ba ka seng kan sa leit ban iakynduh ia ki bor pyniaid ka Shillong Cantonment briew ban pyntikna ban weng ia kine ki briew na kane ka jaka.
