Ka Employment Monitoring cell ka KSU hynne ka sngi ka la leit ban aiti dorkhas sha ka Deputy Commissioner ka East Khasi Hills District halor ki 15 tylli mat ban pynjanai ia ka rukom thungkam jong ka DSC. U Assistant General Secretary Cum Chairman ka Employment Monitoring cell ka KSU u samla Reuben Naijar ha ka dorkhas, ula kyntu ba ka jingthep kam kadei ban long kaba khuid kaba shai khlem don kano kano ka jingleh thok. Ki 15 tylli ki mat ba ka seng ka ai jingmut ki long, ban thung ia ki Vice Chairman bad ki dkhot jong ka District Selection Committees ki bym don bynta bad ka sorkar, ki nongthep kam kidei ban long kiba shong ba sah ha ka jylla bad kidei ban nang ia ka ktien Khasi haba ki thep ia kano kano ka kam ha DSC, ban pynduh ia ka jingthung Adhoc, Contract bad Casual, ban pynmih ia ka ka Calendar shisien shisnem ban kynthup ia ki tarik ban long eksam, ban pynbna paidbah ia ki mark jong ki candidate kiba iakhun ia ki eksam, ka jingpynkylla ia ki Roll number jong ki candidate ym dei ban don ha ka por ba thep kam, dei ban ai bad ka Carbon copy jong ka OMR sheet sha ki candidate, ban pyllait ia ki answer hadien ka eksam, ka jingthung kam dei ban pyndep hapoh 6 bnai naduh ka sngi ba pyllait ia ka jingpynbna lait kam, ban pynduh ia ka Personal interview na bynta ka kam Grade B, C bad D, ka kaiphod ba shisien shisnem jong ka DC, ki jingkylli kim dei ban lait paidbah, ban thaw ia ka Grievances Cell ha ka DSC.
“Ka seng ka kyntu ia ka sorkar ban pyntikna ba ki nongthep kam kidei ban long ki nongshong shnong ka jylla kiba nang ban kren bad ban thoh ia ka ktien Khasi khnang ba kin lah ban ai ka jingshakri sha ki paidbah,” ong u samla Reuben. Ka seng ka la ai jingmut ruh ia ka sorkar ba kan buh da ki kor CCTV ha ki kamra thoh eksam khnang ban lait na kano kano ka jingleh thok.
