Ai jinghikai ka NEHU halor ka Telemedicine bad Digital Health

Ka UGC-Malviya Mission Teacher Training Centre (MMTTC) ryngkat ka jingiatreilang bad ka Department of Biomedical Engineering jongka skulbah North Eastern Hill University (NEHU),  ki la sdang ia ka ‘Short Term Course’ halor ka “Telemedicine and Digital Health”. Kane ka jingai jinghikai kaba shi taiew ka la sdang naduh hynne ka sngi bad kan kut ha ka 9 tarik u Lber. Ki la don 30 ngut kiba la wan ban iashim bynta ha kane ka jingioh jinghikai kiba kynthup ia ki nonghikai bad ki Research Scholar na kylleng ka ri India bad kine kin ioh ia ki jinghikai bad ki jingbatai kiba bniah na ki riew shemphang na kylleng ki jaka ai jingsumar kiba paw ha ka ri India bad na ki riewstad kiban ai ia ki jingtip bad jinghikai sha ki nongiashim bynta.

U Prof. S.S. Ray u Head jongka Biomedical Engineering Department kum u Symbud Kongsan, ula iaroh ia ki kam kiba la trei da ka Artificial Intelligence ha ka koit ka khiah ha une u spah snem uba mynta bad ula pynpaw ba ki kor teknoloji kila pynwandur ha ka liang ka koit ka khiah khamtam eh ha kaban don ka jingiadei hapdeng ki nongai jingsumar bad ki nongpang. Katba u Coordinator jong kane ka Course u Dr. Dinesh Bhatia, ula pynpaw ia ki jingmyntoi kiban ioh na kane ka jingai jinghikai bad kan iarap ha kaban kyntiew iaka jingnang bad jingstad bad ia ka sap ka phong.

Ka Prof. Quendarisa Kharbuli kaba long ka Director Incharge, kala iathuh ba ka kamram jong ka UGC-MMTTC Centre ka kyntiew ia ka sap ka phong bad ia ki jingnang jingtip jong ki nongsiashimbynta kiba wan ha ki Course ki bapher bapher kiba la pynlong da ka Centre baroh shi snem.