Ka seng Hills State Peoples Democratic Party (HSPDP) mynta ka sngi ka la ai jingmut sha ka Expert Committee halor ka bhah thungkam thungjam ne ka Reservation Policy ba dei ban phah beit 80 percent ia baroh lai tylli ki jaidbynriew ha kane ka jylla.U General secretary ka HSPDP u bah Panbor Ryntathiang ula ong ba dei ban phah 80 percent ia baroh kynthup u Khasi, Jaintia bad u Garo bad ki la ai jingmut ruh ba dei ban pynduh noh ia ka jingbhah thungkam kaba 40 la 40 percent.“Ngi la ai jingmut ba ka bhah thungkam 40:40 ia u Khasi-Jaintia bad u Garo, dei ban pynduh noh bad dei ban ai beit 80 percent ia baroh kata, u Khasi-Jaintia bad Garo ba kin iakhun katba uba tbit, un ioh ia ka kam”, la ong u bah Panbor.
U la ong lyngba kane ka jingai jingmut kan wanrah ia ka jingiakhun kaba khuid bad kan iarap ruh ban ioh ia kiba tbit ha ka kam katba kiba kham lah kham tbit.U bah Panbor u la ong ba ka seng ka la ai jingmut ruh ba ia ki kam kiba hap ha ki district, dei ban mang 90 percent ia ki trai shnong Khasi-Jaintia ha ki district kiba don ha rilum Khasi bad Jaintia bad 90 percent ha ki district kiba hap ha rilum Garo.Ha kaba iadei bad ka jingbhah ha ki jingpule, ka HSPDP ka la ai jingmut ba dei ban bishar bniah halor kane ka bynta, namar ba kam don ka jingbatai shai halor kane ka bynta naduh mynshwa.
