Ka tnat Meghalaya State Planning Board (MSPB) ka Sorkar Jylla hynne ka sngi ka la lum ka jingialang jong 4 tylli ki tnat treikam ka Sorkar Jylla ban iathir halor ka jingjur palat ka jingdheng kali ha Nongbah Shillong. Kine ki 4 tylli ki tnat treikam Sorkar kiba la wan shim bynta ha ka jingialang ki kynthup ka tnat kam pohiing (Police), Public Work Department (PWD), ka tnat pule puthi bad ka tnat Pynroi sor (Urban). Haba kren sha ki lad pathai khubor hadien ba la wai ka jingialang, u Chairman ka MSPB Bah Metlah Lyngdoh ula ong, “Hadien ka jingiakynduh ia baroh ki tnad ba dei lang, ngin sa pynkhreh pat ia ka jingai jingmut ba bniah sha ka sorkar jylla na ka bynta ban leh ia kaba donkam ban weng ia ka jingeh ka jingkhapngiah kali ha ka nongbah Shillong.”
U Bah Metbah ula ong ba na ka liang ka Board kan iai bteng ban iakynduh ia ki tnad bapher bapher ha ki sngi ban wan bad ka jingialang kaba ar ka lah ban long biang hapoh shi taiew ei ei.“Ka kamram ka board ka long ban ai jingmut sha ka sorkar kumno ba kan shim ia ki sienjam. Ka jingialang mynta ka sngi ka long ban ioh sngew shwa tang na kitei ki saw tylli ki tnad bad hadien kane ngin sa shim pat ia ka jingai jingmut na kiwei pat ki tnad bad hadien kane ngin sa lah ban ai jingmut bad pynkhreh ia ki jingai jingmut kiba bniah” u la ong.
Nalor kane u Chairman ka MSPB u la ong ba ka Planning ka la dep ban ai jingmut ia ka Sorkar ban thung kham bun ki pulit pyniaid kali khnang ban lah pynduna ia ka dheng kali. U la iathuh ba ha ka jingialang ka tnad pulit ka la kdew ia ka jingeh na ka daw ka jingduna ki nongtrei.
