U MDC ka Sohra u bah Titosstarwell Chyne, ula ong ba ki nongshynshar shnong ka Shella bad Sohra ki la phah jingthoh sha ka Delimitation Committee ban pynpaw ba ki kwah ban neh kumjuh ki shnong kumba ju long ka MLA bad MDC.
U MDC ka Sohra u bah Titoss haba kren sha ki lad pathai khubor, ula ong ba ka Sohra bad ka Shella kin neh kumjuh kumba long baroh shi katta katta bad kam pat don ka jingiashim bad ka jingia ai ia ki shnong sha kiwei ki konstiwensi.
U bah Titoss ula ong ba ki shnong kiba hap sha ka Shella konstitwensi ha ka MLA, hynrei kiba hap pat sha Sohra ha ka MDC, ki dang kwah ban hap ha ka Sohra konstitwensi ha ka MDC.
Ula ong, “Ki paidbah ki kwah ba ka MLA bad ka MDC konstitwensi kan long kumba ju leh namar ba lada iaid ne bud kumba long ka MLA konstitwensi ka la don teng ka jingjia ha u snem 2014 ha kaba kawei ka konstitwensi, ka Laitkroh, ka la duh noh hapdeng ka jingpyrshah na u MDC ha kato ka por. Hynrei, hadien ka la wan dur biang hadien ba la pynmih ia ka Lyngkyrdem-Laitkroh bad kane ka la iahap katkum ka jinglong ka jaka ka puta.”
Halor kane ka jingkwah ki paidbah, u bah Titoss ula ong ba ki nongsynshar shnong jong ki shnong ki la ai da ka jingthoh sha ka Delimitation Committee ha ka por ba ka wan pynlong ia ka jingsngap paidbah ha Sohra ba ki kwah ban neh kumjuh.
Na ka liang u Chairman ka Delimitation Committee u Dr S Kharsyiemlieh dang shen, ula ong ba don wei ar ki paidbah kiba ai jingthoh sha ka Committee ban pynsngew ba ki kwah ba ka MLA kin ngat kumba ngat ha ka MDC ilekshon.
Ula ong ba ka kam jong kane ka Commmittee ka long tang ban pyniahap ban nym noh shilliang ka jingbun paid ki konstiwensi ha ka MDC ileskhon.
