U MP ka Shillong u Dr. Ricky Andrew J Syngkon mynta ka sngi u la iakynduh bad u la ai da ka jingthoh ha u Myntri ka tnad Road and Transport ka sorkar India u Nitin Gadkari bad kyntu ban tuklar halor ka surokbah NH6 ha jylla Meghalaya.
Ha ka jingthoh ba ula ai sha u Myntri sorkar pdeng, u Dr Syngkon u la ong ba kane ka surok ba pyniasoh ia ka Assam, Meghalaya, Mizoram, Tripura ka la sniew tasam haduh ba ka la don ka jingduh ki mynsiem briew.
“Nga kyntu ba phin shimkhia ban pynbha noh ia kane ka surok mardor na ka bynta ka jingbit jingbiang u paidbah,” ong u Dr Syngkon ha ka shithi.
Ha ka shithi, u MP u la ong ruh ba ka bynta jong kane ka surok na Jowai sha Ratacherra ha Jaintia Hills ka Meghalaya ka la sniew palat bad ka la buh jingeh ia ka leit ka wan jong ki paidbah ha kane ka thain shatei lammihngi ka India.
Ula ong, ka jingsniew kane ka surok ka la ktah ruh ia ka kamai kajih jong ki briew bad kiwei ki jingdonkam ha kine ki khyndiat snem haduh mynta.
