Ai khublei ka HSPDP Jaintia ba pyntrei kam ia ka Block Lumshnong

U bah Wanshwa Nongtdu District President  jong ka Jaintia Hills District u la ai khublei ia u myntri ba dei peit ia ki kam pynroi nongkyndong u Abu Taher Mandal bad ia ka sorkar ba la sngap ia ka jingkyntu ka party HSPDP ban pyntrei kam ia ka Community bad Rural Development Block Lumshnong. Katkum ka jingpynbna sorkar kaba la pynmih ha ka 16th Rymphang 2024,  la thung ia u bah Lamriche Kharmon MCS ban shimti ia ka kam Block Development Officer  jong ka Block  Lumshnong bad kane kan long ka jingmyntoi ia ki paidbah kane ka thain.

Ia ka Lumshnong C&RD Block la plie da u myntri rangbah ka jylla ha 5 tarik Nohprah 2022, hynrei haduh ka 2 tarik Rymphang 2024 ka sngi ba u President ka HSPDP Jaintia Hills ula leit ban iakynduh ia u myntri kam pynroi nongkyndong kam pat treikam. Na ka liang jong ka party HSPDP Jaintia Hills ka ai khublei ia u myntri namar ba u la ai ka jingkular ha ka jingiakynduh bad ula pynurlong ia ka jingkular jong u ha ka 16 tarik Rymphang, 2024 ba la pynmih ia ka jingpynbna sorkar ba la thung ia u BDO jong ka Block Lumshnong.

Na ka bynta ka jingmyntoi ki 56 tylli ki shnong ba hap hapoh kane ka Blok, ka MLA jong ka thain ka la kren ha ka dorbar mang tyngka halor kane Block ha kaba kum ka party ka ai khublei ia ka MLA ka kong Santa Mary Shylla kaba la kren ia kane ka kam hapoh ka iing dorbar thawain ka jylla hadien ba la dep mih kane ka jingpynbna sorkar.