Ki nongialam ka Marmaiñ Area Youth Upliftment (MAYU) kaba dei ka kynhun jong ki riew paidbah ka Jaidbynriew Karbi, mynta ka sngi ki la mih shakhmat ban pynpaw ia ka jingsngewnguh kaba khraw ia u nongmihkhmat ka Nongpoh Konstituensi u Bah Mayral Born Syiem halor ka jingshimkhia jong u ban ai jingmut lem na bynta ban ai bhah iohkam iohjam ha ka State Job Reservation Policy, ia kaba u la aiti sha ka Expert Committee. Ha ka kyrwoh ba la phah da ki nongialam ka MAYU, ba kynthup ia u Bah Diren Kleiñ bad u Bah Komin Terang nalor kiwei kiwei ki nongialam, ki la ai khublei kyrpang ia ka jingshimkhia jong u Bah Mayral Born Syiem ban ia kren ne ai jingmut lem sha ka Expert Committee na ka bynta ban kyntiew lem ia ka bhah iohkam ha ka jylla na bynta ki Jaidbynriew rit paid kum ki Karbi, Rabha bad Hajong kaba long na ka 5% sha ka 10%.
Ki la pynpaw ruh, ba ki dap da ka jingkmen ban sakhi ba kum u nongmihkhmat u la shim ka jingkitkhlieh ban ia kren ia kane ka mat kaba kongsan na bynta ka bit ka biang ka jingkyntiew ia ka lawei iohkam iohjam jong kine ki Jaidbynriew kiba shong basah ha ka jylla Meghalaya khamtam ha Ri Bhoi District. “Haba phai katkum ka NITI Aayog ka rukom bhah aikam ai jam ka dei ban don shisha ia ka jingkylla ban pynthymmai bad la dei por ba kane ka sorkar jylla ba mynta kan kyntiew noh ia ka bhah na ka 5% sha ka 10% ne 15% na bynta ka jingmyntoi lang jong kito ki Jaidbynriew rit paid kiba shong basah ha kane ka jylla”, pynpaw ki nongialam ka MAYU ha ka kyrwoh.
Shuh shuh ruh, kine ki nongialam ka Jaidbynriew Karbi ki la pynpaw ba ki ai ka jingkyrshan kaba radbah ia ka jingai jingmut jong u MLA ka Nongpoh Konstituensi ha kaba ia dei bad ka jingthungkam thungjam lyngba ki District Selection Committee (DSC) da kaba kdew ba ka jingthung kam ka dei ban leit beit sha ki trai district ym ia kito kiba nabar ka district khnang ban ailad ia ki samla kiba deihok jong kito ki district ban ioh ia la ka bhah iohkam.
