Ai khublei u Syiem ka Raid Marwet halor ka jingjop ka lehniam Sohjer

Hadien ka jinglah ban pyndep ia ka lehniam ka leh rukom kaba jop, u Paiem ka Raid Marwet u Paiem Ken Syiem, u la pynpaw ia ka jingkmen bad ai ruh ia ka jingkhublei kaba kyrpang ia baroh ki khun ki hajar jong ka Raid Marwet hapoh ka Hima Mylliem Syiemship kiba la ai ka jingiatreilang ban pynlong ia ka lehniam Sohjer kaba jop.
Ka lehniam Sohjer kaba dei ka lehniam kaba shisien shisnem jong ka Raid Marwet, Hima Mylliem Syiemship hapoh Ri Bhoi District, kaba la pynlong naduh ka 17 tarik u Kyllalyngkot haduh 20 tarik Kyllalyngkot kaba ju pynlong ban ainguh aidem ia u Blei Trai Kynrad halor ka jingkyrkhu ka jong u ia ki khun ki hajar ka Raid ban pynioh ia u soh nyngkong jong ka jingtreishitom jong ki baroh shisnem.
Haba kren bad u Nongthoh Khubor, u Paiem Ken Syiem, u la pynpaw ia ka jingkmen kaba khraw ban ioh ban pyndep ia baroh ka lehniam leh rukom bad ka knia ka khriam katkum ka riti dustur jong ka Raid ha ryngkat ka jingiatreilang bad ki Lyngdoh Longsan, Mansan bad ki khun ki hajar jong ka Raid bad ai khublei kyrpang ia ki ha ka jingiatreilang ban pynlong ia kane ka lehniam kaba jop.
Sa shisien, kum u khlieh duh ka Raid Marwet, u la ai ruh ia ka jingkitbok kitrwiang na ka bynta ka bha ka miat ka roi ka par bad ka jingbit jingbiang ka bha ka miat jong ki khun ki hajar jong ka Raid Marwet na ka bynta u ne u snem baroh shisnem.