Ki nongialam ka Kyntiewlang Village Organization kaba kdup ruh ia ki 7 tylli ki Self Help Group (SHg) mynta ka 4 tarik Naiwieng ki la ioh ban leh kmen ia ka jingdap 4 snem jong ka kynhun ha ka jingshakri paidbah bad ka imlang sahlang hapoh ka shnong Korstep Nonglyngdoh ha Ri Bhoi District. Ha kane ka sngi, lehkmen la wan ban ai mynsiem ruh da u MLA ka Nongpoh Konstituensi u Bah Mayral Born Syiem, kum u kongsan, u Bah Balajied Rani, MDC ka Nongpoh, ka Kong Veronika Syngkli President Kyntiewlang Village, u Bah Andreas Makri Rangbah Shnong Korstep Nonglyngdoh, Bah Isaïa Syngkli Rangbah Shnong Korstep Nongtluh lem bad ki Dkhot na ka Synroplang Village organisation Korstep Nongtluh.
Haba kren ha kane ka sngi, u Bah Mayral Born Syiem, u la ai khublei kyrpang ia baroh ki nongialam jong kane Kyntiewlang VO kiba da ka jingtrei shitom jong ki baroh mynta ki la kynjoh sha u mawmer ba saw snem ka jingshakri ban kyrshan ia ka shnong ka thaw ka imlang ka sahlang bad ban kyntiew ruh para dkhot khlem ka jingiathew shilliang iano iano ruh. U la ong ruh, ba kano kano ka kynhun kaba don ka jingiatylli bad ka jingia sngewthuh jingmut ban trei ia kino kino ki kam kumba la sakhi da ka jingiatreilang ka VO bad ki dkhot ki SHGs, kam long kaba eh ia kum kata ka kynhun ban kiew bad ban ai jingmyntoi ruh ia kiwei kiwei ki para nongshong shnong khamtam ban kot ia ka thong kumba la buh.
Shuh shuh ruh, u la kyntu ia ki nongialam bad dkhot ka VO bad ki SHGs ba kin nang pynbha shuh shuh ia ki kam shakri na bynta ban leh ruh ia ki kam babha ha ka imlang ka sahlang ban nang wanrah shuh shuh kiwei kiwei ki jait kam kiba kham pher da ka jingiatreilang ruh bad ki tnat treikam sorkar bapher bapher na bynta ka jingmyntoi bad ka jingkiew jong ka shnong ka thaw.
