Ka jingialang Convocation kaba shiphew jong ka skul bah University of Science and Technology Meghalaya (USTM) ka ba la long mynta ka sngi ka 27 tarik Nailar, ka la long shisha kaba shongkun ha kaba la wan ban ïa skhi lang daka jingiadon shibun jong ki Vice Chancellor, ki riewstad, bad kiwei kiwei ki riew pawkhmat.
Ha kane ka Convocation kaba 10 naka liang katei ka Skul bah ka la ïoh ban pyndonburom ïa samla kiba la pyndep ïaki kyrdan pule jong ki ha ki kyrdan bapher bapher hakaba ki la don haduh 1,639 ngut kiba la pyndep ia ka kyrdan pule, napdeng kine, 17 ngut ki riewstad ki la ioh ia ka kyrdan Ph.D, 906 ngut ki la ioh ia ka kyrdan Post Graduate, bad 716 ngut ki la ioh ia ka kyrdan Undergraduate.
Na ka liang ka USTM ka La pynkup burom ruh ïa ki arngut ki riew pawkhmat jong ka kolshor na jylla Assam bad jylla Meghalaya kiba kynthup ïa u Zubeen Garg bad u Lou Majaw da ka degree na ka bynta ka jingnoh synniang kaba khraw jong ki ha ka liang ka art bad ka kolshor, ki kam pynphriang shabar, ka jingsuk, ka jingïatylli, bad ka jingroi jong ka imlang sahlang da ki kam rwai ki jong ki.
Ha katei ka Convocation kaba 10 jong ka skul bah USTM la wan ban ïa sakhi lang da ki riew pawkhmat kiba kynthup ia ka Prof. Neelima Gupta, VC, Dr. Harisingh Gour University, U Prof. Dr. Ami U. Upadhyay, VC, Vice Chancellor jong ka skulbah Mizoram; U Prof. Dr. u Sat Prakash Bansal, u VC, Central University jong ka Himachal Pradesh, U Prof. Ganga Prasad Prasain, u VC ka Tripura University, u Prof. Saket Kushwaha, u VC. ka skulbah Rajiv Gandhi; U Prof. Prabha Shankar Shukla u VC, NEHU, Shillong u Dr. R.M. Pant, VC, ka skulbah Assam, Silchar lem bad kiwei kiwei ki riewpaw khmat naki jylla bapher bapher.
Haba kren ha katei ka jingïalang pynkup burom ïaki samla kiba la pyndep ïaki jingpule, u Chairman barim ka UGC u Prof Ved Prakash u ba la pynpaw shibun ki jingsngew ha ryngkat ka jingïaroh halor ka jinglah jong kane ka skul bah ban kyntiew shibun haba iadei ba ka pule puthi ha kane ka thain bad ha kajuh kapor u la pynpaw ruh ba u don ka jingkyrmen ba ka jingnang jingstad kaba la ai lyngba ka skul bah kan sa nang iai kyntiew iaki khynnah kiba wan ban pule hakane ka skul bah kaba don ha ka jylla Meghalaya.
U Chancellor ka USTM u Shri Mahbubul Hoque u la pdiang sngewbha ïa baroh kiba la ïa wan ban shim bynta bad ban ïa don lang ha katei ka sngi kaba la pynlong ruh ka jingjop ka ba khraw ïa kane ka Convocation kaba 10.
U Chancellor ka USTM u la ong ruh, “Ngi don ïaka jing angnud ban kyntiew ïa kane ka skulbah kaba don hapoh ka jylla Meghalaya ban ïa katjuh ha ka kyrdan bad kiwei pat ki skul bah kiba la paw haka pyrthei dakaba kyrpad ruh ïa baroh ki nongïashim bynta ba kin ai ïaka jing ïa snohktilang ha ka jingpyrshang ban pynkylla ïa kane ka skulbah sha ka jaka pule kaba don ha ka kyrdan pyrthei bad ym tang ha ka kam pule kane ka skul bah ka ka tyrwa ruh ïaka jingïatreilang ha ka ban kyntiew ruh ïaka jaitbynriew”.
Khatduh, u Chancellor u la pynpaw ruh ka jingsngewnguh ïa ka Sorkar jylla Meghalaya kaba la ju don barabor ba syndah bad kane ka skul bah ban ai ïaka jingkyrshan naduh ba la seng ïa ka USTM.
