Ka Khasi Students Union (KSU) hynne ka sngi ka la ai jingmut ia ka Expert Committee halor ka State Reservation Policy ban bhah noh 50% ia ki Khasi-Jaintia bad 40% sha ki Garo ha ka jingpynbeit thymmai ia ka Reservation Policy jong ka jylla.Ka KSU ka la phah ia katei ka jingai jingmut sha ka Expert Committee lyngba u Bah LK Diengdoh uba dei u Secretary ka Expert Committee on State Reservation Policy.Ka KSU ka la pynpaw ba katkum ka khana samari jong u snem 2011 jong ka Meghalaya, ka jingdon paid jong ki Khasi-Jaintia ka la kot ia ka 14.1 lak ngut katba ki Garo ki don 8.21 lak tam. Kumta, kane ka jingkhein ka pyni ia ka jingdonkam ban pynbeit thymmai noh ia ka State Reservation Policy khnang ba kan don ka jingmihkhmat bad ka jingplie lad ia baroh ki riewshimet na ka jaidbynriew Khasi-Jaintia bad Garo bad da kaba peit iaka jinglong jingman ka khanasamari jong ka Meghalaya, ngi ai jingmut ban bhah 50% na ki kam ba lait sha ki paid Khasi-Jaintia bad 40% ia ki paid Garo katba 5% na ka bynta kiwei pat ki Scheduled Tribe bad Scheduled Caste ha ki kam ba lait hapoh ka Jylla bad 5 % kaba tam ban buh sha ka Unreserved Category.
Ka KSU ka la ai jingmut ruh ba ha kaba iadei bad ki kam ba lait ha ki District, dei ban ailad shwa ia ki samla trai shnong kiba sah hapoh jong ka district ha ki kam kiba lait bad ha kawei pat ka kyntien haba pyntreikam ia ka jingbhah 90% ia ka jingthungkam ha rilum Garo dei ban leit beit sha ki Garo haba ym don ki Khasi-Jaintia kiba thep ia ka kam bad kumjuh ruh ha Khasi-Jaintia Hills Distict dei ban bhah 90% sha ki Khasi-Jaintia haba ym don ki samla Garo kiba thep ia ka kam. Nalor kane, ka KSU ka la ban jur ruh ia ka jingdonkam ban pynthikna ba ka Roster System jong ka State Reservation Policy ka dei ban treikam nangne shakhmat kata naduh ka sngi ba treikam ka Reservation Policy ba la pynkylla thymmai ne dep pynmih ka Sorkar ha ka Gazette ka Meghalaya.
Ka KSU ka la kyntu ruh ban ai 100 % ka bhah ia ki Khasi-Jaintia na ka bynta ka jingthungkam Nonghikai ha baroh ki skul kiba hap hapoh ka Schedule area jong ka Ri-lum Khasi Jaintia bad 100% ka bhah ia ki paid Garo n aka bynta ka kam nonghikai ha ki skul kiba hap hapoh ka Schedule area jong ka Ri-lum Garo. Ka KSU kala ai jingmut ruh ba ha kane ka Reservation Policy ba thymmai, dei ban pynduh pyndam noh ia ka Backlog Reserve Vacancy ne ban rah shakhmat ia ki kam ba khlem lah ban thung pyndap jong ki paid Garo.
