Ki nongialam ka Meghalaya SSA School Association (MSSASA) hynne ka sngi ki la iakynduh ia u Myntri Rangbah ka jylla u Conrad K Sangma ha Tura ha kaba ka sorkar jylla kan sa khot iakren ia ki nonghikai SSA ha shwa kan shim ia ka rai ba khatduh. U President jong ka MSSASA u Bah Aristole C Rymbai hadien ka jingiakynduh ia u Myntri Rangbah ka jylla u Conrad K Sangma, ula ong “Ha katei ka jingialang, ngi lah iakren sani bha halor ki katto katne ki mat kiba la pynkhreh da ka tnad pule puthi ha kaba iadei bad ka policy na ka bynta ka jingshngain ha ka jingtreikam jong ki nonghikai SSA ha ka jylla Meghalaya”. Kum ban shu kdew ka MSSASA ka la ai por 2 bnai ia ka sorkar jylla ban thaw ia ka polisi treikam thymmai na bynta ki 13000 ngut ki nonghikai SSA ha ka jylla.
U Bah Aristotle ula ong, “U Myntri Rangbah ula pyntip ia ngi ba ka sorkar ka jongu ka iengskhem bad ka long kaba biang bad katei ka mat, kumta shen ka sorkar jylla kan sa khot ban iatai sani ha kaba iadei bad katei ka mat, hashwa ba ka sorkar kan ioh ban shim ia ka rai kaba khatduh”.U la ong, ba ka jingialang hynne ka sngi ka la long kaba seisoh bad ki kyrmen ha ki sngi ban wan, ka sorkar kan pynmih ia ka policy ban shngain ki nonghikai SSA ha ka jylla kumba la leh da kiwei pat ki jylla kiba don ha ka ri India. U Nongialam ka MSSASA ula ai khublei ruh ia baroh ki myntri ka sorkar jylla kiba la kyrshan ia ka mat jingdawa jongki, ha ka jingialang jong ka kynhun myntri kaba dang shu dep shen ha Resubelpara, North Garo Hills District.
“Ngi lah dep ai khublei bad pynpaw ia ka jingsngewnguh ia ka sorkar jylla hapoh ka jingialam u Myntri Rangbah uConrad K Sangma kiba la mynjur ban pynjynsur ia ka rta jong ki nonghikai SSA na ka 37 snem sha ka 45 snem, khnang ba kin ioh ia ka lad ban applai kam sorkar ha kaba iadei bad ka kam hikai naduh na ka kyrdan Lower Primary shaduh ka kyrdan Higher Secondary” la pynkut u nongialam ka MSSASA.
