Kawei na ki shlem ai jinghikai Computer sha ki khun samla jong ka dong bad ka thaiñ Ribhoi, kaba la tip kum ka Ka Regional Institute of Advanced Studies (RIAS), myn ha ka 29 tarik Jylliew ka la pynkup burom ïa ki samla pule kiba la pyndep ïa ki jingshah hikai haki kyrdan bapher bapher jong ka Computer Application ïa kaba la pynlong mynta ka sngi ha Science Hall ha Nongpoh. Ha katei ka jingïalang pynkup burom la wan ban sakhi lang da u Bah A.L. Hek, myntri ka tnad ri jingri jong ka sorkar jylla uba shim bynta kum u Kongsan jong ka program haka jingdon lang ka kong Rona Khymdeit ka MDC barim jong ka Nongpoh Constituency, Bah Kyrshan Timung Rangbah Shnong ka Diwon bad u Bah Skhem B Swett uba dei u Director jong ka RIAS ha ka jingïadon ryngkat lang ki samla pule kiba la dep pyntbit ha ki kyrdan bapher bapher.
U Bah AL Hek kum u kongsan u la ai ka jingïaroh ïa ki samla pule kiba la kloi ban mih shakhmat ban nang lum jingstad shuh shuh ïa lade nalor ki kam pule puthi hapoh ki kamra skul. U la ai ka jingïaroh ruh ïa ka RIAS halor ka jingpyrshang jong ka ban ai jinghikai kaba bniah ha ki jait jingstad computer bapher bapher ban kyntiew ïa ka sap ka phong bad ka jinglah jong ki samla pule. U bah Skhem B Swett, Director ka RIAS u la ong ba ka jingsdang jong kane ka Shlem ai jinghikai computer ka long ban plie ïaka lad ka lynti naka bynta ki khun samla ba kin nang ïoh ïaka lad ban wat jingnang jingtip ha kaba ïa dei bad ka jingstad computer. U la ong ruh, ha kane ka juk stad mynta la da peit ha baroh ki liang la hap ban pyndonkam daki kor computer.
U la kyntu ruh ïaki khun samla ba kim dei ban shu shaniah tang haka wat kam sorkar, hynrei ïa kaei kaba la shah hikai dei ban pyndonkam hok ïaka bad da kynmaw ruh ban lum ïaki jingstad haba dang ioh ïaka lad, da kaba bynrap ruh, “ha kane ka juk stad mynta tang ki ba trei shitom bad kiba minot kin poi sha ka thong”.Ha katei ka sngi la sam ruh ïaki syrnod sha ki samla kiba la pyndep ïaki jinghikai bapher bapher ha kaba ïadei bad ka kor Computer.
