Ai Trading License pathar ka JHADC ia ki bar Jylla:FKJGP

Ka seng FKJGP-Khliehriat Circle hapoh ka jingialam u President u bah Michal Chyrmang ryngkat ki dkhot ka FKJGP-Jaintia Zone ba la ialam da u bah Marhok kynti Marboh Vice President bad ka FKJGP-East Jaintia Hills mynta ka sngi ka la pynlong ia ka jingkhynra trading Licence, labour Licence ha ki thain Ladrymbai bad Dkhiah West. Katkum ka kyrwoh ba la phah da u bah Michal Chyrmang ka iathuh na ka liang ka seng na ka por sha ka por ka la ai jingthoh sha ka JHADC ban khynra trading Licence hapoh East Jaintia, namar ka dei ka kamram jong ka council hynrei kam juh leh eiei kumta na ka liang seng kam banse ban leit khynra trading Licence. Ha ka jingkynra mynta ka sngi, ka seng ka lap ba bun ki bar jylla ki don ia ka trading Licence hynrei kham bun na ki dukan kim don ia ka Labour Licence, haba iadei bad ki  dukan thoh Tim ‘Teer Counter’ ruh bun ki don ia ki Licence. Katba ia ki kito ki dukan ki bym biang ki kot ki sla ka seng ka la ai por ban pynbiang hapoh ar taiew namar hadien ka ar taiew kan leit ban khynra biang bad lada lap bym biang ka seng kan leh ia kaba donkam.

Ha ka jingleit khynra trading License mynta ka sngi ka seng ka lap ba ka District Council ka ai licence pathar ia ki bar jylla kiba wan nangno nangno na Pakistan ne Bangladesh ka ai beit ki Licence khaii, khlem da pyrkhat shuh ia ki trai ri trai muluk. Na ka liang ka seng ka la kynnoh ba ka jingleh jong ka JHADC ka la pynkhein ia ki kyndon ka council namar katkum ka ain section 10 (2)(iv) jong ka United Khasi Jaintia hills District (trading by none-tribals ) Regulations,1954 ka khanglad ban ai trading Licence ia ki bar jylla lada don ki trai Ri trai muluk kiba lah ban trei ia kajuh ka kam. Katkum katei ka ain ka JHADC kam lah ban ai Licence khaii ia u bar jylla ia ki kam ba ki trai jylla ki lah ban trei, kum ki dukan die jain, die juti, dukan die waidong bad dukan khapsniuh. Hato kum kine ki jait kam balei ki trai jylla kim lah se ban trei, ka la buh jingkylli, kane ka rukom treikam ka Council ha ka jaka ban iada ia ki trai Ri trai muluk ka iada pynban ia ki bar jylla da kaba ai trading Licence ban khaii kaba long pyrshah ia ka ain.

Ka seng FKJGP ka kyntu ia ka District council ban sangeh noh ban ai trading Licence ia ki bar jylla khnang ban im lem ki paradoh para snam bad ka seng ka kren shai ba kane kam dei ka jingsdang lane ka jingkut hynrei ngin iai bteng ban khynra sha kiwei ki thain ruh ha kine ki sngi ban wan. Khadduh ka seng ka ai khublei ia ka tnat pulit, ki Media kiba ia donlang ha katei ka jing khynra bad khamtam ia ki Dorbar Shnong Ladrymbai kiba ai ka jingiatreilang bad seng ha katei ka sngi.