Ka Khasi Student Union kawei naki Seng kaba ju kit ju bah ïaka khia ka shon jong ki Longïing kiba duk dakaba ju pynshna ïaki ïing bad aiti pat sha ki trai. Ïa kane ka kam leh isynei la sakhi biang haka shnong Umnget, Ribhoi District hakaba naka liang ka Khasi Student Union North Khasi Hill District ka la ïoh ban aiti pat sa kawei ka ïing sha ki trai ïing tang hadien ba ki la dep ban shna pyn itynnad bha. Katei ka longïing kaba la ïoh ban pdiang ïaka ïing naka KSU-NKHD kadei ka Longïing jong i kong Meda Wardkhar iba naka shnong Umnget, Ribhoi District. kaba la shna pynbha ïaka ïing jong i kong Meda Wardkhar ban aiti ïa katei ka ïing hakaba la ïoh ruh ban pynlong īaka jingïalang kaba lyngkot ha phyllaw jong katei ka ïing. Ha katei ka sngi la ïa donlang naduh u President rangbah la KSU-NKHD u bah Ferdinald Kharkamni, Bah Lestar Nongbet president ka Umsning Circle bah Lawrence Kharlyngdoh Rangbah shnong Umnget, lem bad ki dkhot jong ka KSU naki Circle bad Unit bapher bapher hakaba la ïa donlang ruh da ki nongïalam jong ka kynhun Synjuk ki Nongtrei Mystery Umsaw Nongkharai Circle kiba kynthup ïa u bah Tony Shylla Nongaibuit ka kynhun bad u bah Abithius Tado Secretary.
Kum ban kdew hangne, Katei ka ïing kadei kaba la shu sah khongreng khlem da shna pyndep kaba la ïoh lyngba ka skim Ïing ba duk. Hadien ba ki dkhot ka KSU ki la ïohi ba katei ka longïing kam kot bor ban shna pyndep ïa ka ïing bad ka la ïohi ruh ïaka jing donkam jong katei ka longïing ban ïoh ïaka ïing naka bynta ba kin shong kin sah, Ki Nongïalam ka KSU ka la pynlum ïaka jingïalang ban ïa mir jingmut halor katei ka kam bad lyngba ka Construction Committee jong ka KSU lem bad ka jingïatrei lang bad ka Synjuk ki Nongtrei Mystery Umsaw Nongkharai Circle la lah ban tei pynbha noh ïa katei ka ïing ïaka ba la ïoh ban aiti noh mynta ka sngi sha ka kong Meda Wardkhar. Naka liang ki bahaïing ha sem jong ka kong Meda Wardkhar ki la pynpaw ïaka jingsngew nguh ha ryngkat ka jing ai khublei ïaki nongïalam ka KSU ba ki la ïohi ïaka jing jynjar jong ka Para jong ki. Kum ka ïing ka sem ki la pynpaw ba kim lah ban shu peit haba ka para ka shong ka sah haka ïing kaba jot ba pei bad naka liang jong ki kim kot bor ban shna pynbha ïaka ïing, hynrei lyngba ka jingsngew lem bad ka mynsiem isynei jong ki nongïalam ka KSU ka para jong ki ka la ïoh ïaka ïing kaba bha ba kan shong kan sah bad la ki khun ki kti.
U Bah Ferdinand Kharkamni President Rangbah jong ka KSU-NKHD, u la pynpaw ka jingkmen ba kum ka Seng ka la lah ban aiti biang sa kawei ka ïing sha ki trai hadien ba ka Seng ka la dep ban pynshna pynbha. U la ïathuh ruh ba hadien ba ki nongïalam ka KSU ki la ïoh ïa katei ka longïing ba ka la donkam ïaka ïing, naka liang ka Seng ka la pynlong daka jingïalang ban peit bniah halor ka jinglong jingman jong katei ka longïing. Naka liang ka Seng hadien ba ka la shim ïaka rai ban maramot noh ia katei ka ïing, Naka liang ka Seng ka la aiti ïaka Construction committee jong ka Seng ba kan pyndep ïa katei ka kam. U tei u nongïalam ka KSU u la ïathuh ruh ba kane ka jingshna ïa katei ka ïing kam dei baroh kawei hynrei ka dei kaba la shu maramot malu mala ïa kaei kaba la sahteng, naba katei ka ïing kadei kaba la shu shah ih khlem da shna pyndep kaba la ïoh lyngba ka skim shna ïing ba duk.U Bah Ferdinald u la ai khublei ruh ïa ka kynhun jong ka Synjuk ki Nongtrei Mystery kaba la don bynta kaba khraw ja ka ban shna pyndep ïa katei ka ïing bad kumjuh ruh ïaka Umling circle bad ka Pahamsyiem Syiem Unit kaba la shimkhia naduh nyngkong ban pyndep ïa katei ka ïing. Ha kajuh kapor u la ai khublei ruh ïa baroh ki riew shimet ki ba la mih shakhmat ban ïarap ban pyndep ïa kane ka kam kaba bha jong ka Seng. U bah Ferdinald u la pynpaw ruh ba ka Seng kan nang bteng ban leh ïa kine ki kam ba bha naba ka Seng ka don ïaka jing ngeit ba baroh u briew u dei ban don ïaka ïing ba kin rih tngen.
