U Bah Gabriel Wahlang, MLA, MDC ka Nongstoin Constituency u la ap satang ia ka rai ki nongkyrshan ban leit rung sha ha NPP na ka bynta ban ioh doh kyndang na ka sorkar. Kane ka la pawshai ha ka jingialang ba la khot pynlong da u Bah Gabriel Wahlang ha Bishop Hall, Nongstoin ban iakren halor ki kam sam scheme bad katkum ka jingiathuh ki nongkyrshan ba hakhmat jong utei u MLA, la ong ba ha katei ka sngi, u Bah Gabriel u la pynpaw ba ka long kaba eh ia u ban don ha ka liang pyrshah na ka bynta ban wanrah jingmyntoi ia ki paidbah bad u donkam ban donlang ha ka sorkar khnang ba un lah ban trei na ka bynta ki paidbah.
La iathuh ba u Bah Gabriel u la nang iaid hi shakhmat ia katei ka kam bad um da pynpaw shai la un leit rung beit beit sha ka Party NPP ne un shu leit kyrshan shimet. Na ka liang kitei ki nongkyrshan u Bah Gabriel ki la pynpaw ba lada pyrkhat shisien pyrkhat bad lada u leh ia kano kano kaba pynmyntoi ia u paidbah, kata ka long kaba biang hynrei lada ka jingleh jongu ka long tang na ka bynta ka myntoi shimet kane kan sa pynlong ia ki ban pyrkhat thymmai noh.
Ki la pynpaw ba ka sorkar MDA ka dei kaba synroplang da ka BJP, kumta ka long kaba eh ia ngi ki party Congress ban leit iakyrsumlang bad ka BJP la ha ki jylla ne ka Ri hi baroh kawei.
Kitei ki nongkyrshan ki ieh ruh ha ka jingstad jong u Bah Gabriel kum u nongialam ban shim ia ka rai hynrei ki la pynpaw ruh ba lada u shim ia ki sienjam ba bakla kiba ktah ia u paidbah nongkyrshan ba la pynjop donburom ia u, na ka liang jongki ruh kin sa shim la ka jong ka sienjam.
