U Lamphang ka iing dorbar thawain u Thomas A Sangma hynne ka sngi u la pyntip ba u dang ap ia u Bah Ronnie V Lyngdoh ban ai shithi iehnoh kam kum u Nongialam ka Liang Pyrshah (LO) ha shuwa ba un shim rai ban pynduh noh kum nongialam liang pyrshah ha ka iing Dorbar.
Haba ia kren sha ki lad pathai khubor Lamphang ula ong, “Nga ngeit ba baroh ki ïa tip ba u Nongialam liang pyrshah mynta u don marwei ha ka iing dorbar, kumta ka Ophis u Lamphang kan hap ban pynduh noh ia ka jingithuh kum u Nongialam ka Liang Pyrshah”. U Lamphang ula pyntip ba haduh mynta ym pat don ba wan na ki Party ka Liang Pyrshah ban wan buh ka jingkyrpad ban ai ia ka shuki Nongialam Liangpyrshah.
“Nga lah ban leh ha la ka jong ka por ban shim rai bad shong bishar ia ka kam. Ngam lah ban shim rai khlem ka jingai jingthoh” la ong u Lamphang. Lah ban kdew hangne ba u Bah Ronnie V Lyngdoh u MLA ka Congress na Mylliem uba bat ia ka shuki Nongialam ka Liang Pyrshah, ula sah marwei kum u dkhot ka Congress ha iing dorbar hadien ba 3 ngut ki MLA Congress ki la leit ban iasoh noh sha ka NPP.
