Ba hikai ïa ki paidbah ban leit bam phlang sha kper kiwei por mynsngi

Ka President ka HSPDP Women Wing, ka kong Badariti L Nonglait, ka la ther ia u nongialam ka VPP uba la hikai ia ki paidbah ban leit bam phlang sha kper kiwei por mynsngi, bad mynmiet sa wan phai biang sha la sem. Haba kren ha ka jingialap elekshon ia u kyrtong ka RDA u bah Robertjune Kharjahrin ha Mawngap, ka kong Badariti ka la ong ba kane ka seng thymmai ka kwah ia ka jingkhuid ha ka synshar khaddar da kaba ialam bakla pat ia ki nongthep vote. Ka la kynnoh, ” Kane ka seng sain pyrthei thymmai, kaba kwah ia ka jingkhuid jingsuba ha ka synshar khadar hynrei u nongialam jongka, uba pynshlur ia ki nongthep vote ban leit bam phlang sha kper kiwei por mynsngi, bad mynmiet sa wan phai biang sha la sem. Kita kiba kwah ia ka jingsynshar khadar kaba khuid, pynban dei kita hi kiba hikai biang ia ki paidbah ban ngop ia kaei kaba ki seng ri thor kiba wan hikai bakla ia u paidbah ha kane ka ri Khasi. Katba shaba leit, ki kynnoh bamsap lut ia ki nongialam ka ri bad ka jaitbynriew, pynban ialade ki hikai kum kita ki jait jinghikai”.

Ka la ong ba ki don kiba pynshit ban ialam bakla ia u paidbah hynrei kim tip lynti kumno ban iaid namar ba kan long kumba thep sha thliew. Ka President ka HSPDP Women Wing, ka la ong ba ki party ri thor kim don por ban peit ia ki jingeh ka jaitbynriew lada jied ia u paradoh parasnam ruh namar ba kin hap ban kohnguh ia u ka party rithor jongki hi bad dei ban jied ia u MP na party riewlum uba laitluid uban kren khlem kano kano ka jingshah teh ne shah pyniaid ha kiwei. Ha kajuh ka por, ka takrain ia ki nongmihkhmat na kane ka jaitbynriew Khasi, kiba thmu ban pynkylla khongpong bad wanrah ia ka sang ka ma ha ka kur ka jait bad ka riti dustur.”Ha kine ki sngi, ki don ki nongmihkhmat kiba ong ba ka jingshim jait ka dei ka mon laitluid jong u briew shimet shimet, hangta la kulmar ka jaitbytnriew, namar haba im ka riti dustir im ka jaitbynriew, hynrei kine ki mut ban pyllong laitlan ia ka jaitbynriew.

Ka jingithuh kyrpang ia ka jaitbynriew Khasi, ka dei na ka riti shim jait shim khong bad lada bakla, kin khyllem ki dorbar kur, kin ieng ki dorbar kha, bad hangta kiew sa ka sang ka ma”, la ong ka Kong Badariti.  Ka la bynrap, “Kum ka kynthei, nga la iaid kylleng ka ri Khasi-Jaintia mynshwa ban don ka ain kaba thikna ha ka rukom shim jait, ban pynkup bor ia ki dorbar kur, ban ithuh ia ki rangbah kur hynrei kaba sngewsih ka long ba kaei kaba ngi iohi ki dei kijuh kiba mih ha ka kyrteng seng riewlum, ki dei kijuh kiba pyrta ieid jaitbynriew kiba kwah ban pynkylla khongpong ia ka riti dustur shim jait shim khong jong u Khasi Khara”.