Ka Khasi Student Union (KSU) South West Khasi Hills bad ka KSU Balat Border Area Circle kila aiti daka dorkhas shaka deputy commissioner (DC) ka East Khasi Hills ban phah tuklar halor ka jingioh rung laitlan ki nong Bangladesh sha Meghalaya lyngba ka thain Dangar. Kane ka jingai dorkhas ka KSU ka wan hadien ka jingsaphriang ki dur khih ba la ïohi ïa ka jingïoh rung laitlan ki nong Bangladesh ha ki thaiñ Dangar kaba hap hapoh ka East Khasi Hills District.
Lyngba ki dur khiah la iohi ba ki nong Bangladesh ki la wan da ki lieng hapoh ka shnong Dangar ban wan kit maw. Haba kren sha ki lad pathai khubor, u President ka KSU Balat Border Area Circle u samla Bonsen Snaitang, u la ong ruh ba katkum ka jingsaphriang na ki dur ba la ïoh ring la ïohi ba kitei ki nong Bangladesh ki ju wan kiew hapoh u pud u sam jong ka Ri India haduh kumba lai sien ha ka shitaïew.
U samla Bonsen ula ong baka seng ka suba jur ba kane ka jingwan kiew jong ki nong Bangladeshi kam dei tang ba ki wan kiew ban wan kit maw hynrei ka don ruh ka jingpyrshang ban pynrung tuh na katei ka jaka ban wan buhai shnong hapoh ki bynta jong ka East Khasi Hills District bad kiwei kiwei ki bynta.
“Ka seng bad ki paidbah ka thain Dangar kim shaniah ïa ka rukom treikam jong ki shipai ïada khappud ki Border Security Force (BSF) namar kumba ka paw kine ki shipai ba ap pahara watla ki ïohi ïa ka jingwan kiew jong ki nong Bangladeshi hynrei ki la shu peitkai bad kim shym la khang ne kem ïa kitei ki nong Bangladeshi kiba wan rung beaiñ hapoh u pud u sam jong ka Ri India” la ong u samla Bonsen.
