Ka San Shnong Youth Welfare Organization (SSYWO) ka la phah da ka jingthoh sha u Superintendent of Police (SP) ka East Khasi Hills ban dawa buh noh da ki Pulit pynïaid kali ha Iew 7 Mer.
Kane ka jingdawa Pulit pyniaid kali kadei khnang ban iarap iaki nong leit nong wan jong ki paidbah namar ka jingjur palat jingdheng kali kaba man ka por.
Ha ka jingthoh sha u SP East Khasi Hills, u General Secretary ka SSYWO u Bah Lionel Nongkhlaw u la ong ba ka iew 7 Mer kadei kaba la long pdeng bad kumta ki briew na kylleng ki wan iew man ka sngi bad kumta ka jingbym don ki pulit pynïaid kali khamtam ha ki por mynsngi ka la pynwit bad ktah jur ïa ka leit ka wan jong ki paidbah na katei ka surok bah nalor ba ka buh jingma ruh ïa ki nongïaid lynti.
Ka SSYWO ka kyntu ïa ka tnad pulit ba kan shimkhia lang ïa katei ka jingkyrpad na ka bynta ka bit ka biang jong ki paidbah bad ruh ba khnang ba ki kali kin ïoh ban ïaid khlem don jingwit na katei ka surok.
