Ka Hynniewtrep Youth Council (HYC) ka la kyntu ia ka Director General of Police (DGP) ka Meghalaya ka Kong Idashisha Nongrang ban tuklar halor ka jingjyllei drok hapoh ka Jylla. Haba aiti da ka Dorkhas sha ka Kong Nongrang hynne ka sngi, u President ka HYC u Bah Roy Kupar Synrem ula ong ba ka tnat Pulit ka donkam ban pynkhlain shuh ban tehlakam ia ka jingwan poi u drok hapoh ka Jylla.“Ngi kyntu ba ka tnat Pulit ka dei ban shim da ki sienjam ba tyngeh ban tehlakam ia ka jingwan poi u drok hapoh ka Jylla. Ngi kyntu ia ki Pulit ka Jylla, ki shipai ia da khappud Border Security Force (BSF) ka tnat Custom & Central Excise ban pynlong ka jingtalasi barabor bad ban iatreilang na ka bynta ban iakhun pyrshah ka jingjyllei drok hapoh ka Jylla bad ha kajuh ka por ban iatreilang bad ki Bor Shnong ban talasi ha ki jaka rung jaka mih jong ka Jylla” la ong u Bah Roy.
U Bah Roy ula ong baka NDPS Act, 1985 ka don lypa ki kyndon ba tyngeh na ka bynta ki nongkhaii bad nongdih drok hynrei ka long kaba shisha ba watla ka kam beain kan long kaba heh, ki don ki nongkhaii drok kiba ioh jamin noh.Ki don bun ki kam beain hapoh ka NDPS cases kiba la hap pynkut noh iaka Case namar ka jingbymtreikam lane ka jingbym iahap ki kyndon.“Ka jingioh jamih ki nongleh kam beain hapoh ka NDPS ka buh jingma haka imlang sahlang bad ka wanrah ka jingduh mynsiem iaki paidbah ban ioh bishar hok haka imlang sahlang namar kane donkam ba ki Investigating Agencies/Prosecutors ki dei ban long kiba tip kham bniah iaki kyndon halor ka rukom tohkit ne bishar naka bynta ban ioh pyntreikam hok iaka ain” ula ong.
“Naka bynta ban poi shaka thong bad ban pyntreikam hok iaka ain bad ban bishar hok hapoh ka NDPS cases, ki Enforcement Agencies jong ka Jylla kidei ban tip lut, kumno ban iaid katkum ka Act haka por tohkit naka bynta ban iaid beit ka jingbishar”.Haba iadei bad ki mar tuh, u president ka HYC ula ong “Ka Section 317 jong ka Bharatiya Nyaya Sanhita, 2023 (Repealing the Indian Penal Code, 1860) kan treikam naduh 1 tarik Naitung 2024 ka don ki kyndon pyrshah ia kino kino kiba thied iaki mar tuh.U Bah Roy ula iathuh ba ka seng ka la ioh jingtip na ki nongdih drok bad kiba haiing ha sem bad ki nongdih drok kim banse ban tuh na iing tang ban ioh pisa thied drok bad ki la die tad ia ki mar ba shu tuh.“Naka bynta ban pynshai paidbah halor ka Section 317 jong ka Bharatiya Nyaya Sanhita, 2023, ka tnat ka dei ban ialap paidbah khnang ba ki paidbah kin sngewthuh ba ka long beain ban thied ia ki martuh, ba wan die da ki nongdih drok” ula ong.
