Ba leit kyrshan u MDC Mawkyrwat

Wat hapdeng ka jingshah kynthoh ha ki babun ki bynta bad ka jingshah kynnoh bamsap ha ki babun ki liang, hynrei ka National People’s Party (NPP) ka la nangroi nangsan bad ha kine ki khyndiat sngi ba la dep ka la don ka jingkylla ba syndet syndet ha ka sain hima sima ha South West Khasi Hills District ha kaba la iohi ruh ia ka jingkiew ba syndet syndet jong ka seng NPP hapoh ka District. Ha ka 6 tarik u Rymphang, 2024, u nongialam barim ka HYC South West Khasi Hills District uba bat ia ka kam Vice President bad ha kajuh ka por uba long ruh u President ka HYC South Lyngngam Circle, u Bah Mandilos Nongbri ha ryngkat bad ki spah ngut ki nongbud jong u, kiba dei na ka seng UDP, BJP bad Congress, ki la wan ban pyniasoh sha ka NPP ha ka jingialang kaba la long ha shnong Rangthong, South West Khasi Hills District. Nalor u Bah Nongbri bad ka kynhun jong u, mynta sa u nongialam ka Congress bad MDC ba mynta jong ka Mawkyrwat Constituency, u Bah Carness Sohshang bad ki hajar ngut ki nongbud jong u, ki la pynkhreh shait-shait ban pyniasoh noh bad kane ka party kaba ialam ia ka Sorkar hapoh ka Jylla.

Ia kane ka jingthmu jong u MDC Mawkyrwat ban pyniasoh NPP la pyntip da u President ka NPP South West Khasi Hills District bad State President NPYF, u bah Kitborlang Nongrem hadien ba la wai ka jingialang jong ka NPP Mawkyrwat Block Committee, kaba la long ha Nativity Hall, Mawkyrwat ha ka 6 tarik Rymphang 2024 kaba la iadonlang ruh u State Vice President ka NPP, u Bah Hamlet Dohling, u Adviser sha ka tnat Education ka Sorkar Jylla bad Ex-MLA Mawsynram, Bah HM Shangpliang, u President NPP West Khasi Hills Distirct, Bah Macmillan Byrsat, u Adhoc President ka NPP Mawkyrwat, Bah HS Diengdoh lem bad kiwei kiwei. Haba kren ha ki nongthoh khubor, u Bah Kitborlang Nongrem u la kubur ba ka la don ka jingiakren hapdeng ki nongialam ka NPP bad u Bah Carness Sohshang lem bad ka kynhun jong u, na ka bynta ba un wan rung noh sha ka seng NPP.

U la ong ba na ka liang jong ka NPP Mawkyrwat Block Committee lem bad ka NPP hi baroh kawei, ki pdiang sngewbha ia baroh ki riew shimet bad ki kynhun kiba kwah ban pyniasoh ialade sha ka seng NPP na ka bynta ban pynkhlain ia ka party. Ha kawei pat ka liang, ka tyllong khubor napoh ka iing Congress, kata, napoh ka Mawkyrwat Block Congress Committee (MBCC), la ioh jingtip ba baroh ki nongkitkam jong ka MBCC ki la dep iehnohkam (resigned) ha kine ki khyndiat taiew ba la dep, bad la khylliap lama syndon (dissolved) ia ka MBCC. La sngewthuh ruh ba u Bah Carness Sohshang un long u kyrtong MDC jong ka NPP napoh ka Mawkyrwat Constituency. Kane ka jinglong jingman ha ka sain hima sima hapoh South West Khasi Hills District, kata, ha baroh ar tylli ki Constituency – ka Ranikor bad Mawkyrwat Constituency – ka la ai jingkyrmen shibun ia ka Kong Ampareen Lyngdoh, kyrtong MP jong ka NPP sha ka ilekshon Lok Sabha, 2024 ha kaba ka lah ruh ban jop ia kane ka ilekshon mynta ka kynti.