Ka Ranikor Area Farmers Association (RAFA) ha ryngkat ki nongrep na ka thain Ranikor, South West Khasi Hills District naduh ki shnong kiba hap hapoh ka area Nongnah, Nongïohijngai, Dirang, Mawlangbah, 18 Mile bad kiwei kiwei de ki shnong ba marjan, ha ka 20 tarik u Kyllalyngkot 2024 ki la shim ia ka rai ban siat iap noh naphang ia ki hati khlaw kiba don ha katei ka thaiñ, kiba ju pynjot ia ki jingthung jingtep bad mar rep manla ka por, namar ba ka por ban lum ia ki mar rep ka la dei, hynrei ban leit sha bri pat kim nud shuh. Ia kane ka rai la shim ha ki ar tylli ki jingialang ba la pynlong da ka Ranikor Area Farmers Association (RAFA) hynnin ka sngi saitjain 20 tarik u Kyllalyngkot 2024 ha shnong Phodkroh bad ha shnong Nongnah.
Kine ki hati khlaw ki la wan bad sah la slem bah ha kine ki thaiñ ha kaba ki nongrep kim nud shuh wat tang ban leit sha ki bri ban lum ban lang ia ki jingthung jingtep jong ki khamtam eh ba ka por ka la dei ban kheit noh ia u synsar, bad kiwei de ki mar rep kum kwai, sohmrit, tympew, kait, sla tyrpad, bad phandien, namar ka jingdon kitei ki hati khlaw kiba ju kthong bad beh kylla ia ki briew. Na ka liang jong ka Ranikor Area Farmers Association (RAFA) ryngkat ki nongrep katei ka thaiñ, ki la ujor manla ka por sha ka tnat Wildlife bad kumjuh ha u Deputy Commissioner ka South West Khasi Hills District, ha kaba ki la kular ruh ban shimkhia bad beh noh ia kine ki hati khlaw na katei ka thaiñ, hynrei kim leh eiei haduh mynta.
Dei halor kane ka nongrim ba ka RAFA lem bad ki nongrep kim banse ban shim syndon da ka rai ban pyniap noh shi syndon ia kitei ki mrad khlaw kiba ju pyndik ia ki nongrep bad pynjot ia ki jingthung jingtep man ka por. Ki nongkren ha kine ki jingialang ki long u Bah Michael Lyngdoh President ka RAFA, Bah Kyrmen Ryja Secretary RAFA, ki riew rangbah kum u Apualus D. Sangma bad Bah Romoland Paliar ha ryngkat da ka jingsakhie lang ki paidbah nongrep ha kane ka thaiñ kiba la mynjur ban shu pyniap noh ia kitei ki hati khlaw.
+ There are no comments
Add yours