Ba pynrit rta thep kam Pulit, leit pan jingpynshai ki samla na ka CRB

Ki katto katne ngut ki samla ba thepkam Pulit kila leit ban kynduh ia Secretary ka Central Recruitment Board (CRB) ban dawa pynbeit iaka Corrigendum bad ban bishar biang iaka rta thepkam.  Naduh 10 baje tam ki katto katne ki samla thepkam Pulit haka jingialam ka samla Banrilang Pyngrope kila ialum hakhmat ka ophis Police Training School Mawroh.  La sakhi ruh ba ki don katto katne ngut ki longkmie kila synranglang iala ki khun ban ioh jingpynshai naka CRB haba iadei bad ka jingpynduna iaka rta thepkam Pulit.

Haba kren sha ki lad pathai khubor hadien ba kynduh ia Secretary ka CRB, ka samla Banrilang Pyngrope kala iathuh ba ki khlem ioh kano kano ka jingpynshai hynrei ka CRB kala bthah iaki ban leit ban jingpynshai naka tnat Personel ka Sorkar Jylla. “Ngi duh mynsiem namar ka Secretary kala ong ba kane kamdei ka tnat ban pynmih iaka Corrigendum ne ban pynbeit bad ka jingduhnong jong ngi haka por COVID kadei tang ka daw” la ong ka Samla Banrilang.

Naka liang ki samla ba thepkam Pulit kila pynpaw baka Sorkar kadei ban pyrkhat bha biang haba iadei bad ka jingpynjlan rta thepkam namar kila pynkhreh bha ban ioh iaka kam Pulit watla ka Sorkar Jylla kala pynslem bha ban pynbna laitkam. “Ngi ruh ngi donhok ban ioh ia kane ka kam namar ngi la pynkhreh bha bad naka liang ka Sorkar Jylla kala pynslem ban pynbna lait kam bad ka snem jong ngi ruh kala heh” la ong uwei samla thepkam.