Ki nongrep jong ka Pynthorneiñ ba don harud ka wah Myntdu kaba ker sawdong iaka sor Jowai, mynta ka kynti kila mad iaka lanot kaba kim pat ju mad haka jingim kum ki nongrep man ba poi ki Aiom slap, kata ka long haki pynthor kba ba kila dep thung dangshen da kaba khmih lynti ban ioh ia u kba u khaw kumba ju long manla u snem, hynrei pynban la wan thyllep noh da ki maw ki shyiap bad khyndew kiba tuid naka jingpyntrei thymmai ia u surok ba pyniasoh na Treïongriang ha Khliehtyrshi. Halor kane ka jingshah thyllep haka ka sngi nyngkong 15/07/24 ka seng ki nongrep bad trai jaka ba tip kum ka Myntdu Pynthorneiñ Farmer & Welfare Producer Organisation kila pynlong ka jingiakynduhlang ha Pynthorneiñ bad pynpaw ruh ka jingbynniaw halor ka jingshah ktah shah pynjulor ki pynthor kba jong ki.U nongialam ka seng dei u Pynshngaiñ Rymbai kum u President, Secretary u Pyntngen Kyndait, Vice President u Jurbha Phawa bad K.L Pariat Advicer.Haba iakren bad ki nongrep ba shah ktah ki ong, kaba kum kane ka apot kam pat ju wan jia ha ki lyngkha rep jong ki wat lada jur slap ne shlei um katno katno ruh, hynrei mynta u snem naka daw ka jingpyntrei thymmai ia u surok na Treïongriang sha Khliehtyrshi ynda la jur u slap ki maw ki shyiap bad khyndew ki la tuid lyngba ka wahduid “liar kamkam” bad thyllep ia kiba bun ki lyngkha. Haba iadei bad ka wahduid “liar kamkam” ki ong, mynshwa ka don la ka jong ka lynti, hynrei naduh ba tuid ki maw ki shyiap ki lynti jong kane ka wahduid ruh kila shah set lut bad kylla madan kumta ka um kala tuid saphret kylleng kylleng najrong ki pynthor tba bala shah thyllep. Ki pynpaw ruh ka jingsngewsih ba ia u khaw ba ki juh ioh ban bam na kine ki pynthor ruh kin ym ioh shuh mynta u snem.
Kumta ki kyntu iaki bor sorkar ban ai jingiarap halor ka jingduhnong jong ki, bad ruh ban iarap pynshna lynti iaka wahduid “Liar kamkam” ba kan ioh lynti ban tuid lym kumta kin ym lah shuh wat tang ban pynbha biang iaki lyngkha kba.Naka liang u K.L.Pariat Advicer ka seng ki nongrep kumjuh ruh jong ka seng “Khuid yaka Wah Myntdu” ula bynrap da kaba ong, kane kam dei shuh ka jingleh ka mariang hynrei kala dei ka jingleh hi u briew lyngba ka jingshna surok bad la i kumba la leh khnang. Ha kajuh ka por ruh u ong kane ka jingshah ktah ki nongrep kumjuh ka jingshah ktah ka wah Myntdu dei namar bym shimkhia ki bor district iaka jingkyrpad ka seng ki nongrep bad jingkyrpad ka seng “Khuid Yaka Wah Myntdu” naduh u snem 2022, nalor bala don ruh ka hukum jong ka NGT.
Bad kane ka pynthor ka la long kum ka pliang ja iaki hajar ki mynsiem, ba lada ym lah ban pynkhuid ym tip shuh kumno kin long.”Ki kyntien ba juh ong ka sorkar lada khlem ki nongrep ngin ym ioh jingbam, kala kylla long bym don jingmut namar ba ki khlem patiaw iaki jingeh jingjynjar ki nongrep”. Ong u K.L.Pariat. Ha kane ka sngi ula pyntip ruh ba kila rai ban leit ai jingthoh shaka ïingbishar ba jan tam ka District and Sessions Court West Jaiñtia Hills namar ba ki iohi iaka jingbym patiaw ka sorkar.
