U Deputy CEM ka KHADC u Bah PN Syiem ula iathuh ba ula phah iaka jingdawa ki paidbah nong shong shnong ka Mawlai Mawroh shaka ka Select Committee ban bishar bniah. Lah ban kdew baka Dorbar Shnong Mawlai Mawroh haka 17 tarik Mynta u bnai, kala lum daka Dorbar ban pyrshah iaka kaiphod jong ka Delimitation Committee kaba la pynhap iaka Mawlai Mawroh shaka Jaiaw Constituency, haka jingpynbeit iaki shnong naka bynta ka ilekshon MDC.
“Ka Dorbar Shnong Mawlai Mawroh, kala ai daka jingthoh sha nga daka ba kdew ba, la kumno kumno ruh ba ki shnong kiba hap hapoh ka Mawlai Town Dorbar, kidei ban don beit haka Mawlai” la ong u Bah PN Syiem. U Bah PN Syiem ula kubur ba ia kane ka rai ban iai neh ka shnong Mawlai Mawroh hapoh ka Mawlai constituency la shim lang haka jingdon ka Mawlai Town Dorbar bad ka Dorbar Shnong Mawlai Mawroh.
Haba kylli, hato ka executive committee jong ka KHADC kan khot ne em daka dorbar kyprang, u Deputy CEM ula ong “Lada ka Select Committee kala dep ban pyndep iaki jingdonkam, nga tharai donkam ban khot daka Dorbar Kyrpang”.
