Ba shah leh tohmet u ophisar, yn phah tohkit ka UDP

Ka United Democratic Party (UDP) ka pynrem jur halor ka jingleh donbor jong ki shipai BSF ia u ophisar jong ka Sorkar Meghalaya, uba trei ha ka tnat Veterinary bad Animal Husbandry Department, Muktapur kaba hap ha ka Block Amlarem. Ka kyrwoh na u General Secretary ka UDP u Bah Jemino Mawthoh, ka kdew ba kane ka jingjia kala jia ha ka 11 tarik Rymphang bad la saphriang ka khubor haki rynsan Social Media ba ophisar u la shah leh donbor, shah tohkit bad la phah ia u ban law ia ki jain phong.

Nalor ka jingshah tohkit bad shah leh tohmet, ki shipai BSF ki la byrgnem ban siat ia u ha Zero Point kaba dei ha khappud jong ka Ri India bad Bangladesh.“Kane ka jingleh jong ki shipai BSF kiba dei ban iada bad ai ia ka jingshngain ia ki briew kiba sah ha ki thain khappud, ka la buh ia kane ka kynhun ha ka jinglehrain. Kane ka jingleh khlemakor jong ki shipai BSF ka long kaei kaei kaba ym lah ban pdiang satia” la ong ka kyrwoh.

Haba iadei bad kane ka UDP ka pyntip ba kan nym shim sting ia kane ka kam bad kan thoh sha u Director General BSF bad ka BSF Vigilance Department ban tohkit halor kane ka jingjia ban ruh ban pynshitom ia kito kiba donkti kiba leh donbor bad pynmynrain ia kat u ophisar jong ka tnat Sorkar jong ka Jylla.