Ba treikam bha ki PIO bad FAA, jop ka rukom pyntreikam ia ka RTI ha Meghalaya

U State Chief Information Commissioner (SCIC) ka Meghalaya u Bah H Nongpluh u la kam ba ka jingpyntreikam ia ka Right to Information (RTI) hapoh ka Jylla ka long kaba iaid beit iaid ryntih namar ka jinglah treikam bha ki First Appellate Authority (FAA) bad ki Public Information Officials (PIO). Haba kren sha ki lad pathai khubor, u Bah Nongpluh u la pyntip baka Commission kam da ioh ki jingujor namar iaki Case la pynkut noh tang hapoh ka kyrdan bad ka jingkhmih jong ki PIO bad FAA.

“Nga lah ban ong ba ka jingpyntreikam ia ka RTI hapoh Meghalaya ka long kaba iaid beit iaid ryntih. Nga lah ban ong ruh ba ka Commission kam ju kham ioh ki jingujor haba iadei bad ka jingslem ka kaiphod namar ia kine ki Case la pyndep bad pynkut haki kyrdan jong ki PIO bad FAA” la ong u Bah Nongpluh. Hashuwa kane u Bah Nongpluh u la ai jingkren ruh haka jingialang lane ka National Meet on RTI Act bala pynlong ha Shillong bad u la ong ba ki PIO bad FAA kidei kiwei kiba kongsan tam haba iadei bad ka jingpyntreikam iaka RTI act.

U Bah Nongpluh u la ong baka RTI act kadei ka jingkhyrkhu bala pynlong ain ha u snem 2005 namar lyngba kane ka ain, ki paidbah kin ioh lut iaki jubab lane jingtip wat na kito ki khep, ba shem jingeh ban ioh. Nalor kane u Bah Nongpluh u la ong ba don ki briew kiba la pyndon kam ia ka RTI ban pyndik ia ki ophisar namar ha kane ka bynta jong ka ain kam don kki kyndon ban ai jingiada ia ki ophisar.