Katto katne ngut ki samla pule kiba la pynkhreh bha ia lade ban thoh ia ka eksam ban ioh leit pule lain Doctor, hynnin ka 5 tarik u Jymmang ki la mad pynban ia ka jingiuh tdong bsein hadien ba ki bor ba dei peit jong ka jaka thoh ekam ba la ithuh da ka National Testing Agency ban pynlong ia ka eksam National Eligibility cum Entrance Test NEET (UG) – 2024, kata ha Alpha English Higher Secondary School ki la bakla ban ai ia ka kot jingkylli da kaba sam ar tylli ki paper bad bun ki khynnah pule napdeng ki 63 ngut ki la thoh shwa ia ka paper ka bym dei. Katkum ka jingujor bad ka jingud ki khynnah pule kiba la leit thoh ia kane ka ekam ban ioh pule lain doctor, ki la pynpaw ba ki la leit ban thoh ia kane ka eksam kaba la ai por 3 kynta ban pyndep bad haba poi ha kamra thoh eksam jong ka Alpha English Higher Secondary School, ki bor ba dei peit ki la sam ia ki kot jingkylli kiba ar tylli haba ki khynnah ki la kylli kano kaba ki dei ban jubab, ki nongap ha kane ka kamra ki la ong ba dei ban thoh baroh ar tylli ki kot jingkylli, ha kaba la don napdeng kine ki samla kiba la thoh shwa da ka kot jingkylli ka bym dei kumba 1 kynta shiteng tad haduh ba ki bor ba dei khmieh ki sa pyntip ba kawei na ki kot jingkylli kam dei kaba donkam ban thoh ne jubab. Haba kren bad katto katne ki khynnah bad ki kmie ki kpa ruh, ki la pynpaw ia ka jingsngewsih kaba jur halor kane ka jingjia ban ai bakla ia ka jingkylli da ki bor ba dei peit jong kane ka jaka thoh eksam na ka bynta ban ioh leit pule doctor ha kaba tang na kane ka jingbakla jong ki nongpyniaid, ki samla pule ki lah ban duh ei ia ka seat ban ioh leit pule doctor, ki la bynrap, ba kito ki khynnah kiba la thoh shwa da ka kot jingkylli ka bym donkam ban jubab, ki la pynlut por 1 kynta shiteng ban jubab ia kane ka jingkylli bad ban sa tip pat ba kato ka kot jingkylli ka dei ka bym donkam bad ki la ioh satang 1 kynta shiteng biang ban jubab ia ka kot jingkylli kaba dei, hato kane ka kam ka dei ka jingbakla jong ki khynnah bad ki khynnah kin mad ia ka jingduhnong kaba khraw mano ban bah khlieh?, buh jingkylli ki kmie ki kpa. Na ka liang ki kmie ki kpa, kiba la pynpaw ia ka jingsngewsih kaba khraw halor kane ka jingjia pyrshah ia ki khun jong ki, kiba la pyntbit bad pynkhreh na ka bynta kane ka eksam ki la leit ban ia kynduh ia ka Principal jong ka Alpha English Higher Secondary School ban pan jingshai halor kane ka jingbakla ban sam ia ki kot jingkylli ha kaba ia dei bad ka eksam ba la buh da ka NTA lyngba ka NEET (UG)-2024 bad ki la dawa ruh ban ailad sa shisien ia kine ki samla pule ban ioh ban thoh kyrpang ia ka eksam katkum ka rukom kaba dei bad na ka liang ka Principal ka la ai jingmut ia ki kmie ki kpa ban thoh da ka dorkhas sha ka NTA ban kyrpad na ka bynta ban ailad ia ki samla pule ban thoh biang ia kane ka eksam.
Haba kren bad I Kong W.K Blah, Principal ka Alpha English Higher Secondary School I ba dei ruh I nongpeit nongkhmieh ia ka jaka ba la pynlong ia kane ka eksam NTA jong ka NEET (UG)-2024, I la pynpaw ia ka jingsngewkhia kaba jur ba kane ka jingjia pyrshah ia ki samla pule ka la wan ban jia tang namar ka jingbym ioh ia ka jingpynshai kaba tikna na ki bor pyniaid jong ka NTA ha kaba ia dei bad ki rukom pyniaid ia ka eksam khamtam ha kaba ia dei bad ka jingsam ia ki kot jingkylli kiba deihok ban thoh da ki samla pule. I la ong ruh, ba kane ka dei ka sien kaba nyngkong eh, ba ka Alpha English Higher Secondary School, ka la iohlad bad jingithuh na ka National Testing Agency (NTA) ban pynlong ia kine ki eksam (Competitive Examination) bad da ka jingkmen ki la pdiang ia kane ka jingithuh kum ka lad ban shakri ia ki samla pule ka dong ka thain Ri Bhoi District ban ioh ia ka jaka thoh eksam kaba kham jan ban ia kiwei kiwei pat ban ia kaba leit thoh eksam sha kiwei kiwei ki jylla, hynrei kaba sngewsih ka long pat, ba katto katne ngut ki khynnah pule ki la mad pynban ia kane ka jingjia ba sngewsih tang namar ka jingbakla sam ia ki kot jingkylli. “Naduh ba ngi la ioh ia ka jingithuh, na ka liang ka NTA ka la khot ia ki bor skul jong ngi ban leh ia ka training ne ka orientation programme sha nongbah New Delhi, hynrei namar ka jingkhim jong ka por, ngim shem la lah ban ioh phah ia ki nonghikai ban leit ia kane ka orientation programme hynrei ngi la shu shimbynta lyngba ki Online Orientation Programme katto katne bad hashwa ba kane ka eksam jong ka NEET (UG)-2024 kan sdang ruh, ngi la pyrshang ban ia kren ne ban wad jingtip na ki bor ka NTA kumno ban pyniaid ia ka hynrei bunsien ngim ju ioh pat ia ka jubab ne ban ioh ia kren tikna halor ki rukom pyniaid eksam (Communication Gaps)”, ong I Kong Blah, da kaba bynrap ruh, ba kane ka dei kawei na ki daw bah ba la wan jia kane ka jingbakla ha kaba ia dei bad ki kot jingkylli ba la jia hynnin ka 5 tarik Jymmang. I Kong W.K Blah, I la iathuh ruh, ba watla ka jingpyrshang ban ioh jingshai na ki bor ka NTA ka long kaba eh bha, hynrei hashwa ban sdang kane ka eksam, I la ioh ia ka phone call napoh ka State Bank of India bad ruh na ka Canara Bank ban wan shim ia ki kot jingkylli na ki bank jong ki, kaba la pynlyngngoh bad buh jingdum ia ka skul hi baroh kawei ha kaba ia dei bad ka jingpyniaid ia ka eksam NEET (UG)-2024, bad dei ha ka jingpyrshang ban wad jingtip ba bniah ha ka 5 tarik u Jymmang tang mar ia sdang ka jingthoh eksam ba la ioh jingshai na u Director u Vijay Kumar ba sa tip shai ba kawei na ki kot jingkylli ba la sam sha ki khynnah pule ka dei kaba bakla bad kumta hi marmar la phah sangeh ban thoh ia katei ka kot jingkylli, tangba don pat ki khynnah pule ki la jied ban thoh shwa ia kane ka jingkylli ba la pynlong ban pynsepei ia ka por jong ki kaba la ai kumba 3 kynta.
Shuh shuh ruh, I la ong, ba ha kane ka sngi ba la thoh ia kane ka eksam, jin ba lada kito ki khynnah kiba la pynsepei ia ka por ban thoh ia ka kot jingkylli kaba bakla, kin mih shakhmat ban pan ia ka por ban thoh biang ia ka kot jingkylli kaba dei, kum ka khlieh jong kane ka centre in jin da la aipor ia ki hynrei namar ba ym shem la don mano mano ruh ban pan por, kumta ki la pyniaid beit katkum ka por ba la buh bad lum thik ia ki kot jubab baroh hadien 3 kynta ba la ai por hynrei dei pat ha ka por 8 baje shiteng eiei janmiet, la wan mih ki kmie ki kpa ban ujor ia kane ka jingjia ha kaba kum ki bor nongpyniaid ia kane ka eksam kim shem la lah shuh ban leh eiei namar la dep ban lum ban lang ia baroh ki kot jubab jong baroh 63 ngut ki khynnah pule bad la buh beit sbiak khlem lah ban sei shuh ia ki. Kum ka khlieh duh jong ka Skul Alpha English Higher Secondary School kaba la ioh ban pynlong ia kane ka eksam kum ka Code Examination Centre, I la ai jingmut ia ki kmie ki kpa ha ryngkat kito ki samla pule kiba la mad ia kane ka apot, ba kin thoh da ka dorkhas sha ka NTA sha New Delhi bad ban pyntip ia kane ka jingjia bad ruh ban pan jingbit ne kyrpad ban ailad biang ia kine ki samla pule ban ioh ban thoh kyrpang ia kane ka eksam ha ki sngi kiban sa nang wan. Lah ban kdew ruh, ba kum kane ka jingjia ka la jia ruh ha ki katto katne tylli ki jylla ka Ri India ha kaba la don ka jingbakla ha ki kot jingkylli bad ruh ka jingbakla ha ki rukom pyniaid thoh eksam hynrei namar ka jingmih shakhmat ki kmie ki kpa ban dawa ai por kham bun ia ki samla pule ban pyndep ia kane ka eksam la lah pat ban pynbeit bad ban pynjlan ia ka por ban thoh ia kane ka eksam jong ka NTA lyngba ka NEET (UG)-2024 kaba dei ka eksam ban ioh leit pule ia ka lain doctor ha ka ri India hi baroh kawei. Ha kajuh ka por, palat 400 tam ngut ki samla ba la pynkhreh ia lade da ki snem ki snem na bynta ban iakhun ia ka exam NEET, pynban ka la long leh nohei bad pynduh mynsiem ia ki namar ba ka Centre ba ki leit thoh exam hynnin ka 5/05/2024 ha St. Mary Mazzarello Girls’ Higher Secondary School, Jowai la mih bun ki kynrum kynram kiba la pynkulmar ia ki samla thoh examin da ki bor pyniaid jong kane ka centre.Kumta hynne ka sngi ki samla ba thoh ia kane ka exam ha ryngkat ki kmie ki kpa lem bad ki nongialam sengbhalang ba kynthup ia ka JSU, KSU ki la leit mih sha St. Mary Mazzarello Girls’ Higher Secondary School ban iakren halor kine ki jingeh. Katkum ka jingiathuh ki samla ba leit thoh ia ka examin NEET ki ong ba ka rukom pyniaid ia kane ka examin kam long kaba beit ba ryntih kynthup naduh ka por sdang thoh exam, ki paper jingkylli ruh shiphang ki ai da kawei, shiphang pat ki ai da kawei.
Don ki samla ba la juh leit thoh teng ki sngewthuh shai ba ki ioh da ka paper ba bakla hynrei haba ki pynsngew ki iakren bad ki nonghikai ruh kin sngap satia. Nangta ki admit card jong ki samla ruh kim treh ban shim kumba shim lang kiwei ki centre wat haba ki samla ki la iai ong shi ong ia ki ban shim. Shuh shuh kine ki samla ki ong nalor ba kila tuh ka por jong ki naduh shwa ban sdang thoh, sa ba ki wan pynkulmar shiphang da kumwei shiphang da kumwei, hynrei kim ai por tam pat ia ki khynnah wat haba dei ka jingbakla jong ki hi ruh.”Ngi ki khynnah shisien ba ngi la sdang thoh ngim kwah ba ki jingpynthut kin wan shi wan shangi hynrei dei ban long kaba jai jai bad iaid beit iaid ryntih, bad ka jingshah tuh por ka la wanrah ka jingduhnong bakhraw, namar ka shi mark ka lah ban pynpass ban pynpheil ia ki samla ba thoh examin” ong ki samla haba kren sha ki lad pathai khubor. Ki ong ruh jingshisha kum ki bor pyniaid ki dei ban shimkhia bha namar kane dei ka lynti iaki samla ban rai iaka lawei, hynrei ki jingjia ba kum kine ki pynduh mynsiem ia ki khun samla kiba la trei shitom ban pynlut ia ka por ka bor bad pisa naka bynta kane ka exam.Na ka liang ki kmie ki kpa jong kine ki khynnah ruh ki pynpaw ka jingdiaw ba khraw da kaba ong, nyngkong ngi sngewkmen ba ngi la ioh ia ka centre ha Jowai hynrei ka long pynban ka jingpynduh jingkyrmen ia ki khun ki kti jong ngi.Ha kane ka sngi ki kmie ki kpa ryngkat bad ki samla ba thoh ia ka examin NEET ki la shim ia ka rai da kaba thoh kawei ka shithi ujor sha ka NTA ban pynsngew ia ki jingeh jong ki bad lada long kaba lah ban ai lad thoh biang ia kane ka exam. Bad na ka liang ka seng JSU ruh ka kular ban bud dien ia kane ban thoh lang sha ka NTA lyngba ka mail bad ban pyntip ruh sha u Myntri ryngbah ka sorkar Jylla, sha u myntri ka tang pule puthi, bad ong ruh donkam ban thoh biang ia kane ka exam ha kane ka centre.
