Ka jylla Meghalaya hynne ka sngi kala ioh ia u Lat ka jylla ba pura, ha kaba u Chandrashekhar H Vijayashankar ula shimti ia katei ka kam bad pyndep iaka jingbamsmai hapoh ka Durbar Hall jong ka Raj Bhavan Shillong. U Chief Justice ka Meghalaya High Court u Justice S Vaidyanathan ula pynbam smai ia u Chandrashekhar H Vijayashankar kum u Lat bathymmai ka jylla, ha kaba la iadonlang u Myntri Rangbah ka jylla u Conrad K Sangma, ki Symbud Myntri Rangbah ka jylla kiba kynthup ia u Bah Prestone Tynsong bad u Bah Sniawbhalang Dhar, u Chief Secretary ka jylla u Bah DP Wahlang, ki Myntri Sorkar, ki MLA, ki heh ophisar sorkar, ki heh shipai bad kiwei kiwei kiba la shah khot sngewbha.
U Chandrashekhar ula shimti kum u Lat ba pura ka jylla Meghalaya, ha ka jaka jong u Lat barim ka jylla u Phagu Chauhan. Kumban shu pynkynmaw, u Chandrashekhar ula long teng u dkhot jong ka iingdorbar Karnataka Legislative Assembly bad ruh kum u MP ka Lok Sabha bad ula long teng ruh u dkhot jongka Karnataka Legislative Council.
