Kum shibynta ban kyrshan bad kyntiew ïa ki briew kiba don jingduna ha ki dkhot met, ka Composite Regional Centre for Skill Development, Rehabilitation hynne ka sngi ka la pynkup bor da ka jingsam ADIP ha U Soso tham Auditorium, State Central Library Shillong, Kane ka long kum shi bynta ban pynbeit ïa ki jingdonkam ba kongsan jong ka koit ka khiah bad ki jingdonkam ban kyrshan iaki briew ba duna dkhot met ha ka imlang sahlang. Ha kane ka sngi la don bynta lang da u Myntri ka tnat Social Welfare u Bah Paul Lyngdoh, Pravin Bakshi uba dei u Commissioner & Secretary jong ka Sorkar Jylla lem bad kiwei kiwei de. La sam ïa ki tiar jingïarap ba kongsan & ki tiar ba la shna khnang ban kyntiew ïa ka jingim jong ki briew kiba don jingduna ha ki dkhot met.
Ha kane ka sngi la sam 125 tylli ki Aids & Appliance kum ki Smart Phone, Auxiliary Crutch, Teaching Learning Material (TLM Kit), Rollator, Hearing aid, CP Chair, Cruches, Wheelchair, Android Tablet bad kiwei kiwei de. Kane ka jingsam iaki tiar ban iarap iaki ba duna dkhot met kadei naka bynta ban kyrshan bad ban pynduna ia ki jingeh ba man ka sngi bad ban pynbha ia ka jinglong jingman jong kiba bun ki longiing. Haba kren ha kane ka sngi u Paul u la ban jur ïa ka jingdonkam jong kane ka Camp, da kaba ong, “Ka thong jong ngi mynta ka sngi ka long ban thaw ïa ka jinglong kaba kynthup lang ïa baroh ha kaba uwei pa uwei u briew, khlem da kheiñ ïa ka jinglah jong u, u lah ban ïoh ïa ki jingtip kiba kongsan bad ban ïoh ïa ki jingïarap kiba lah ban leh. Ngi sngew sarong ban noh synniang sha ka jingbha jingmiat bad ka jinglong laitluid jong ki dkhot jong ka imlang sahlang jong ngi kiba don jingduna ha ki dkhot met.”
U Bah Paul ula khublei ruh ia ka jingaiti, bad ka jingtrei shitom jong ki nongtrei jong ka CRC- Shillong bad u la ai ka jingkyrshan kaba iai bteng na ka bynta ki kam kiba hadien. Naka liang u Director, CRC- Shillong u Dr Ram Shakal Sahani ula ong baka CRC-Shillong kadei naka bynta ka bha ka miat ki briew ba duna dkhot met. U Dr Ram Shakal ula iaroh ia ka jingkyrshan kaba la ai da ka tnad Social Welfare na ka bynta ban pynlong ïa ki kam ba bun rukom, kum ki jingialap paidabh (Awareness Camp), ki jingsam ki tiar jingiarap (Distribution Camp) bad kiwei kiwei de.
