Ka Director jong ka tnad Horticulture, Meghalaya, ka kong D. C. Sohtun, ha ka 25 tarik u Risaw 2024 ka la plie paidbah ia ka Bunshnong Organic Producer Cooperative Society Limited ha ka shnong Kyrdum da ka jingangnud ban kyntiew ia ka kam rep khlem pyndonkam dawai hapoh ka thain. Kane ka society ba thymmai ka dei kaba la seng hapoh ka Mission Organic Value Chain Development for North Eastern Region (MOVCDNER) ha ka Phase-III, bad ka kynthup ia ka Custom Hiring Centre, ka Pack House, ka Small Processing Unit bad ka kali kit marbam ban ai jingkyrshan ia ka ban pyniaid iew ia ki mar rep ba khlem pyndonkam dawai. Ha kane ka jingplie paidbah ia katei ka Society , la iadonlang ryngkat ruh u Bah W.B. Marbaniang, ka kong D.B. Mukhim, Bah T. Diengngan bad kiwei kiwei ki ophisar na ka tnat Horticulture bad Agriculture jong ka Nongstoin, West Khasi Hills.
Ka Bunshnong Cooperative ka don mynta ha ka thong ban rep ia u shynrai ba khlem pyndonkam dawai kaba kynthup na ka bynta ki 7 tylli ki shnong, 522 ngut ki nongrep bad kumba 30 tylli ki kynhun nongrep hapoh ka MOVCDNER. Ki nongrep kiba iashim bynta ha kane ka projek kin ioh jingiarap na ka bynta ki symbai shynrai ba bha, ki jingdonkam ha shnong bad shabar shnong, bad ki tiar ban iarap rep kum ki power tiller, brush cutter bad mini power tiller. Kane ka projek kaba la buh thong san snem, ka ailad ia ki nongrep ban ioh jinghikai bad thmu ruh ban pynioh ïa ki nongrep ïa ka organic certification, ha kaba kin ioh lad ban pynïaid ia ki mar rep jong ki ha ki ïew kiba kham biang ka dor. Ka Director, kong D. C Sohtun, ka la pynpaw ia ka jingdonkam ban iatylli jong ki nongrep bad ka la kyrpad ban shim ia ki sienjam ban kyntiew ia ka kamai kajih bad ban nang kyntiew iaka ioh ka kot khlem da pynjulor ia ka mei mariang. Ka la kyntu ia ka Bunshnong OPCS ban thaw ki lad ki lynti ban pyniaid iew ia ki mar rep jongki, ban kyntiew ia ka rukom shalan ia ki mar ha ki iew ki hat, ban kyntiew ia ka ioh ka kot hapdeng ki nongrep kaba lah ruh ban kyrshan ia ka jingkiew ka ioh ka kot jong ka jylla.
Haba pynpaw halor ki jingma kiba wan na ki jingbam ba la pyndonkam da ki dawai, ka kong Sohtun ka la batai ba ka sorkar ka don ha ka thong ban pynshlur ia ka rep organic kaba long ka lynti kaba shngain bad khlem da pyndonkam ia ki dawai chemical. Ka la pynpaw ruh ia ka jingngeit baskhem ba ka Bunshnong OPCS kan long ka jingpynkhreh thymmai ka ban pyni nuksa sha ka jylla bad ka district baroh kawei na ka bynta ka rep ba khlem pyndonkam dawai.
