Ka Sorkar Jylla kala rai ban pynkhlain ia ka jingdon jong ki Village Defence Party (VDP) ha ki jaka ba la ithuh kum ki jaka ba jyllei u drok.
Kane ka jingpynkhlain iaki VDP ka dei ban iatreilang bad ki bor ka ain ban rat naduh dyngkhong ia ki jingdih pynbuaid ha Meghalaya khamtam u Drok.
Ia kane ka rai la shim ha ka jingialang ba la pyniaid da u Myntri ka Tnad Social Welfare u Bah Paul Lyngdoh ha ka jingiadonlang ki Heh Ophisar ka Tnad kam Pohiing, Social Welfare bad ki Seng treimon sngewbha bapher bapher ha ka jingiakhun pyrshah ia u drok.
Haba kren sha ki lad pathai khubor, u Bah Paul ula iathuh ba la pynlong ia ka jingialang ban iatai halor ka jingiaid ka Drugs Reduction Elimination and Action Mission (DREAM), ki kam kiba la leh bad ruh ka jingphai khmat sha ki sienjam ban sa shim ba kumno yn leh eiei halor ki jingduna kiba mih ha ka jingiakhun ia u drok.
U Bah Paul ula ong, “Kawei na ki kam ba la iakren ka long halor ka jingpynkylla bad jingpynbeit thymmai bad ruh ban khmih ia ki lad ki lynti ha ka ban pynbeit ia ki Village Defence Party (VDP) khamtam ha ka ban ithuh ia ki jaka ba jyllei u drok hapoh ka Nongbah Shillong”.
Ula bynrap kawei na ki mat ba sngewkhia eh ia ngi ka long halor ka jingdonkam ban pynlong ia kane ka prokram kaba iadon bynta lang ki Shnong. Ngim kwah ban iohi ba ka DREAM kan dei tang ka sienjam ba shim da ka Sorkar. Ka long kaba kongsan ban ratdyngkhong ia u drok bad jingdih buaid, ngi donkam ia ka jingiasnohkti lang ki nongtrei mon sngewbha ha ka imlang sahlang” ula bynrap.
U Bah Paul ula pyntip ba ha ki artylli ki jingialang bad ki Dorbar Shnong, ka la mih ka sur ba ki Shnong ki kwah ban iadon bynta lang ha ka ban ithuh bad ruh ban iakhun ia ki jingktah jong u drok bad dei namar kane ka Sorkar ka la rai ban pynkhlain ia ka jingdon jong ki VDP ha kylleng ki jaka jong ka Jylla.
Haba kren halor ka Ain, u Myntri ula ong ba ka dei ka kamram bad ka bynta jong ka VDP ban iarap lang ia ki Pulit ha ka ban tehlakam ia ka shongsuk shongshngain, ka jingsuk haba donkam bad ruh ban iaid pahara ha ki shnong ki thaw ban khanglad ia ki kam tuh kam thiem, kam runar bad kiwei ki kam bymman ban iada ia ka jingim ki paidbah bad ki nongiaid lynti.
