Ban pynsahnam ia la u kpa uba la khlad noh na kane ka sla pyrthei, na ka liang ki khun ryngkat ka lok jong u Bah Leonel Marwein napoh ka shnong Pyndengrei, Nongstoin, ki la shna ia ka madan ialehkai Futsal ba nyngkong eh ha West Khasi Hills District ia kaba ki la ai kyrteng da ka “Leonel Futsal Arena”. Katei ka Futsal Arena ka don ha shnong Pyndengrei, Nongstoin bad la sakhi ba ka jingdon jong katei ka Futsal ka la ai jingmyntoi ym tang ia ki samla kynthei bad shynrang hynrei wat ia kiba la noh ka rta namar lyngba katei ka jingkilan met, ka pynioh biang ia ki ka met ka phad kaba koit ba khlain bad ka kylla long ruh kum ka dawai bah na ka bynta kiba bun jait ki jingshistom ha ka met. Ïa katei ka Futsal Arena la wan ban plie paidbah da u Sordar ka Shnong Pyndengrei u Bah Micheal Marwein ha ryngkat ka jingiadonlang ka lok jong u (L) Leonel Marwein ka kong Bibiana Wahlang bad ki khun ki kti, u MLA/MDC ka Nongstoin u Bah Gabriel Wahlang, u Addl. DC ka WKH u Bah H. K Thabah, u BDO ka Mawshynrut Block Bah R. Kharkongor, ki nongialam shnong, ki senglongkmie, ki samla bad kiwei kiwei.
Ha katei ka sngi na ka liang jong u kongsan u la ioh ban ot ruh ia u Cake bad khap ruh ia u ribon kum ka dak ka jingplie ia katei ka madan bad la sam ruh ia ki khusnam sha kito kiba la don byntalang ban pynurlong ia katei ka madan bad kumjuh sha kito ki nongialehkai futsal kiba la kynjoh palat 60 snem ka arta. Na ka liang ka iing ka sem jong i kong Bibiana Wahlang ka la aiti ruh ia shi set ka jersey sha ka Pyndengrei Sport Social and Cultural Club bad la pynlong ruh ia ka jingsngap jar ba shi minit kum ka dak ka jingkynmaw burom ia u kpa jong katei ka iing. Haba ai jingkren ha katei ka sngi, na ka liang jong u Bah H. K Thabah, Addl. DC ka WKH u la long ba tang ha Nongstoin palat 300 ngut ki samla ki la ngop bad kyrni ha ka jingdih drok bad shibun ki kam sniew ki la sdang ban kynrei ha ka thaiñ na ka jingdon ki jingia ba bunjait.
Namarkata u la kyrmen skhem ba lyngba ka jingplie ia kane ka Futsal, kan ai mynsiem ia ki samla ba kin pynlut por ha ka ban kilan met ha kane ka madan ha ka jaka ba kin ngop ne dih ia ki jingdih pynbuiaid kiba ktah ia ka koit ka khiah bad ka imlang sahlang. Na ka liang u kongsan u Bah Micheal Marwein ruh u la ai khublei kyrpang ia ka kong Bibiana Wahlang ryngkat ki khun ki kti kiba la lah ban pynurlong ia kane ka kam kaba long shisha ka jingmyntoi ia ki samla bad ki paidbah kiba sngewtynnad ban kilan met khnang ba kin lait na ka jingshah pynngop ha ki jingmlien ba sniew. La pynkut ia katei ka sngi da ka jingialehkai Futsal kilan met hapdeng ki officers pyrshah ia ki dkhot ka Executive Committee jong ka Dorbar shnong Pyndengrei.
