Ki dkhot jong ka KSU Ranikor Circle mynta ka sngi ki la ioh ban bat noh ia shi kynhun ki bar jylla ha Ranikor, South West Khasi Hills District, katba ki dang wan kiew na ki thain Maheshkhola, kaba hap hapoh Ranikor Civil Sub-Division, South West Khasi Hills District, kaba dei kawei na ki shnong ba don ha ki khappud jong ka India bad Bangladesh. Katkum ka kyrwoh ba la phah da u President ka KSU South West Khasi Hills District, u samla Forwardman Nongrem la ong ba ka seng ka la bat ia kine ki briew kiba wan kiew na ki thain khappud Bangladesh halor ka nongrim ba ka don jingartatien ioh ba kidei pynban ki khar Bangladesh, kiba wan rung tuh kum ki nongbylla ha katei ha ka thain. U la iathuh ruh ba hadien ba la lap ba kim don ia ki kot ki sla kiba biang, ka KSU ka la aiti noh sha ki pulit jong ka Thanad Ranikor ban leh ia kaba donkam.
U samla Forwardman u la ong ba ka seng ka kyntu ruh ia ki shipai iada khappud (BSF), ka tnat pulit bad ki bor pyniaid District jong ka South West Khasi Hills ba kidei ban shimkhia halor kane ka mat jong ka jingwan kiew be-ain ki briew bym dei ki trai ri trai muluk hapoh ka thain khamtam kito kiba wan na ki thain khappud India-Bangladesh namar ba ka seng hi ka don ia ka jingsuba kaba jur ba ki lah ban don ki khar Bangladesh kiba wan kiew be-ain sha India namar ka jingiakulmar hapoh ka Ri Bangladesh ha kine ki sngi.
U samla Forwardman u la ong ruh ba ka KSU ka maham jur ia ki Contractor bad ki nongaikam ba kim dei ban pyrkhat tang ia ka iohnong shimet jong ki da kaba wanrah da ki khar Bangladeshi ban wan trei ne ban wan bylla, hynrei ki dei ban husiar ioh kan mih kaei kaei ka jingeh hadien ha bud. Ka seng ka maham ba lada ka lap shisha ba ki iarap ia ki bym dei trai ri trai muluk ban wan rung kum ki nongbylla na ka liang ka seng kan ym aili, hynrei kan leh da kaba tyngeh.
Ha kajuh ka por, u samla Forwardman u la ong ruh ba ka seng hi kan nang iai peitngor ban pyni da ka kam ban iada ia ka thain khappud bad lada ki bor District, ki bor pulit bad ki shipai iada khappud kim shimkhia ne kim lah ban leheiei halor kane ka mat, na ka liang ka seng kan leh ia kaba donkam bad kan shim hi ia la ka bynta.
