Ka jingwan sieh ia ki ar tylli ki sign board kaba pyni ia ka jingpyntrei ia ka scheme JJM ha ka shnong Permadan kaba don ha Mawthadraishan Block ka la pynbitar ia ka HYC Mawthadraishan Circle hadien ba ka seng ka la lap ba ha kitei ki sign board la thoh da ka kyrteng jong ki ar tylli ki shnong ki bym don satia wat hapoh ka Mawthadraishan Block bad ka kyrteng jong ka Block ruh kumba ka paw ha kitei ki Sign board kam dei ka Mawthadraishan hynrei ka dei ka Mawshynrut.
U samla Lamborness Basaiawmoit u wei na ki Dkhot ka HYC Mawthadraishan Circle u la pynpaw ia ka jingbitar bad ong ba kane ka jingleh ka tnat PHE ban wan pynieng da ki sign board kiba don ia ka kyrteng ka shnong Megadop bad ka shnong Shilliang Rynniaw hapoh ha shnong Permadan jong ka Eastern West Khasi Hills District ka long ka bym lah pdiang nalor ba katkum ka jingpyni haka signboard ki snem ba pyntrei iaka JJM ha Permadan bad kumba paw ha kitei ka signboard ka iapher. U la ong ruh kaba kham sngewlyngngoh shuh shuh ka long ba ia kitei ki signboard la wan pynieng kham pajih na shnong bad khlem ka jingtip jong ka shnong.
Shuh shuh u la ong ba ka seng kan ym shong kli kti hynrei kan iaid sha ki bor ba halor ha kaba iadei kane ka kam bad ka seng ka ai por 3 sngi iaka tnat ba dei khmih ba kan ai iaka jingpynshai kaba bniah halor ka jingwan pynieng ia kitei ki signboard kiba don haruh ka surok Kynshi – Myriaw.
