Bthah ka Committee ia ki DC ban khang 19 tylli ki karkhana sain dewiong be-ain

Khadkyndai tylli ki karkhana sain dewiong (coke plants) kiba treikam ha jylla kim pat ioh ia ka Consent To Operate (CTO) la iathuh ka kaiphod u nongbishar ba la shongthait u Justice BP Katakey. Ki 19 tylli ki karkhana ki don ha East Jaintia Hills, West Khasi Hills bad South West Khasi Hills. Katkum ka kaiphod ba la phah sha ka iing bishar Meghalaya High Court, ka ong katkum ka jingtip ba la ai da u Member Secretary of Meghalaya State Pollution Control Board (MSPCB), na ki 19 tylli ki karkhana sain dewiong East Jaintia Hills, ki don tang 9 kiba la ioh CTO haduh mynta. Katba 10 tylli kim pat ioh ia ka CTO haduh mynta. Ki karkhana sain dewiong ar tylli ha West Jaintia Hills ruh ki don CTO.

Kumjuh ha West Khasi Hills na saw tylli ki karkhana sain dewiong tang kawei ka la ioh CTO, katba ki lai tylli ki treikam khlem CTO. Ha South West Khasi Hills baroh hynriew tylli ki karkhana sain dewiong kim don satia ia ka CTO haduh mynta.Katkum ka kaiphod ka paw na ki 31 tylli ki karkhana sain dewiong ha ka jylla kiba la ioh ia ka  Consent To Establish (CTE) na ka MSPCB, ki dei tang 12 tylli kiba la ioh CTO ban treikam haduh mynta. Katba 19 tylli ki karkhana sain dewiong kim pat ioh haduh mynta ia ka CTO ban treikam, katkum ka rukom kitei ki karkhana kim lah ban treikam khlem ka CTO hynrei ki la shu treikam be-ain ban bam jem.

La iathuh haduh 2 tarik Rympang, 2024 u Member Secretary ka MSPCB ula iathuh baroh ki 7 tylli ki karkhana sain nar rot kynthup 6 ha Ri-Bhoi bad kawei ka West Khasi Hills ki la ioh ia ka CTO. Ka committee ka la btah ia ki Deputy Commissioner (DC) East Jaintia Hills, West Khasi Hills bad South West Khasi Hills ban khang noh ia 19 tylli ki karkhana sain dewiong katba kim pat ioh ia ka CTO na bynta ban treikam.